УЛУУСПУТ ОҤОРОН ТАҺААРААЧЧЫЛАРЫН ДЬААРБАҤКАТА - ДЬОКУУСКАЙГА
УЛУУСПУТ ОҤОРОН ТАҺААРААЧЧЫЛАРЫН ДЬААРБАҤКАТА - ДЬОКУУСКАЙГА Балаҕан ыйын 12–13 күннэригэр киин куорат Хомсомуоллар болуоссаттара сахалыы сайаҕас тыынынан туолла. Манна тэриллибит улууспут оҥорон таһаарааччыларын дьаарбаҥката сыл биир умнуллубат, үтүө түгэнинэн буолла, үгүс-элбэх киһини түмэ тарта. Икки күн устата бырааһынньыктыы эйгэ сатыылаата: биир дойдулаахтарбыт, куорат олохтоохторо уонна ыалдьыттар тоҕуоруһа мустан, үрүҥ илгэттэн оҥоһуллубут эгэлгэ эмис-этин, минньигэс аһын амсайан, атыылаһан, дуоһуйууну ыллылар. Улууспут баһылыга Дмитрий Тихонов тыа сирин дьоно-сэргэтэ бигэ туруктаах, сайдыылаах буолалларыгар туһулаан үлэ-хамнас бара турарын туһунан эттэ. Куоракка олорор биир дойдулаахтарыгар сылгыны-сүөһүнү ииттиҥ, оттоон-мастаан, дойдугутун кытта ситимҥитин быһымаҥ, чэгиэн-чэбдик сылдьыҥ диэн алгыс тылларын анаата. Бу дьоһун тэрээһиҥҥэ биһиги киэн туттар тэрилтэлэрбит көхтөөхтүк кытыннылар: «Хоту» ТХПК, «Якутнацпродукт» ТХПК, Павловскайдааҕы үүт собуота, «Алаас Ас» ТХПК, «Хорообут» ХЭТ. Маны таһынан, бааһынай хаһаайыстыбалар — Скрябин Г.С., Иванов Е.П., Ан А.С., Харитонова А.М., Аргунова М., Свинобоева В.И. — бэйэлэрин дьарыктарын табаарын аҕалан атыылаатылар. Айар куттаах дьоммут эмиэ кэккэлэстилэр. "Дойдум сылаас тыына" быыстапканы туруордулар: Роман Иванов, Петр Аргунов, Анисия Федорова-Ааниисийэ, Марианна Маркова, Дария Ноговицына, Агафья Колесова. Биир дойдулаахтарбыт, эстрада чаҕылхай сулустара — Виталий Очиров, Петр Кулаковскай, Айгылаан — тахсан, иэйиилээх ырыаларын бэлэхтээтилэр. Кинилэри кытта А.Д. Макарова аатынан култуура уонна ускуустуба кэллиэһин кэскиллээх устудьуоннара кыттыһан, бырааһынньыгы ситэрэн-хоторон биэрдилэр. Бу курдук, сыллата ыытыллар үтүө үгэскэ кубулуйбут дьаарбаҥка үлэһит дьоммут түмсүүлээҕин уонна төрүт үгэспит сылаас тыынын өссө төгүл итэҕэттилэр. Бар дьоммутугар, кыттааччыларбытыгар, тэрийээччилэрбитигэр истиҥ махталбытын тиэрдэбит! Инникитин даҕаны бу курдук бииргэ буолуоҕуҥ! Мэҥэ Хаҥалас улууһун дьаһалтатын пресс-сулууспата.