1-КЫ ТЫЫЛЛЫМА НЭҺИЛИЭГЭР "БЭРИИҺЭП БЭҺЭ" МЕМОРИАЛЬНАЙ ДУОСКА АРЫЛЫННА
1-КЫ ТЫЫЛЛЫМА НЭҺИЛИЭГЭР "БЭРИИҺЭП БЭҺЭ" МЕМОРИАЛЬНАЙ ДУОСКА АРЫЛЫННА Быйыл биһиги Саха сирин уһулуччулаах судаарыстыбаннай диэйэтэлэ, ССКП Саха Сиринээҕи обкомун бастакы сэкэрэтээрэ, дойдутун сайдыытын туһугар үгүс үлэни ыыппыт, киэн туттар киһибит Семен Захарович Борисов үбүлүөйдээх 115 сылын бэлиэтиибит. Бүгүн кини төрөөбүт алааһыгар "Бэрииһэп бэһэ" мемориальнай дуоска үөрүүлээх арыллыыта буолла. Бу бэс мас анныгар олорон санаатын сааһылаан, дойдутун, норуотун инникитин былааннаан дууһалыын уоскуйар тапталлаах маһа буолбута. Биһиги Семен Борисов олоҕун, үлэтин-хамнаһын өрө тутан, кини үтүө аата үйэттэн үйэҕэ ааттана турарыгар үлэлэһиэхтээхпит. Былатыан Ойуунускайы, Максим Аммосовы уонна атын улуу убайдарбытын кытта тэҥҥэ тутуохтаах сүдү киһибит буоларын өйдүөхтээхпит. Бу Бэс Мас Семен Захарович курдук дойдуга, норуот иннигэр бэриниилээх буолуу бэлиэтэ буолуохтун! Мэҥэ Хаҥалас улууһун дьаһалтатын пресс-сулууспата