АҺЫЫКАЙ АЛААҺЫГАР ТУТУЛЛУБУТ МАҤНАЙГЫ ОСКУОЛА СИРИГЭР МИИТИН ЫЫТЫЛЫННА
АҺЫЫКАЙ АЛААҺЫГАР ТУТУЛЛУБУТ МАҤНАЙГЫ ОСКУОЛА СИРИГЭР МИИТИН ЫЫТЫЛЫННА Алтынньы 2-3 күннэригэр С.З. Борисов аатын сүгэр Тыыллыма орто оскуолата 110 сыллаах үбүлүөйүн бэлиэтиир. Бүгүн Аһыыкай алааһыгар тутуллубут маҥнайгы оскуола сиригэр миитин ыытылынна. Тэрээһиҥҥэ Мэҥэ Хаҥалас улууһун баһылыгын бастакы солбуйааччыта Гаврил Толстяков кыттыыны ылла. 1916 сыллаахха балаҕан ыйын 14 күнүгэр маҥнайгы оскуола олбуоругар 23 үөрэнээччи, төрөппүттэр, олохтоох дьон мустубуттара. Гаврил Васильевич Никифоров-Манньыаттаах уола бу оскуоланы аҕатын дьиэтигэр биир хоһу биэрэн аспыта. Онтон 1918-1919 сылларга үөрэх дьылын көрсө 140 кв миэтирэ иэннээх саҥа оскуола дьиэтин дьэндэппитэ. Бу оскуоланы туттарарыгар кини Лена өрүс сүнньүтүгэр үүммүт улахан мастары кэттэрэн, өрүһүнэн уһаартаран аҕалбыт уонна Ороссолуода биэрэгиттэн оскуола тутуллар сиригэр Эмис алааска диэри биирдии бэрэбинэ иһин биирдии чэй, биир арсыын таҥас, кыра табах төлүүргэ дьону наймалаһан түргэнник тастарбыта. Ол кэнниттэн куораттан дьон таһааран, наймалаһан бэйэтин үбүгэр туттарбыта. Аһыыкай оскуолатыгар бастакы учууталынан II Наахараттан төрүттээх Платонов Иван Иванович буолар. Бу оскуолаҕа араас сылларга Гаврил Васильевич оҕолоро Аркадий, Елена, Лариса учууталлаабыттара. Мэҥэ Хаҥалас улууһун дьаһалтатын пресс-сулууспата