Талааннаах суруйааччы Афанасий Федоров бюһа төрөөбүт дойдутугар арылынна — 18 июня 2026 г. в 10:01:17.198
Талааннаах суруйааччы Афанасий Федоров бюһа төрөөбүт дойдутугар арылынна Бүгүн, бэс ыйын 18 күнүгэр, Тамалакаан нэһилиэгэр суруйааччы, сэһэнньит Афанасий Игнатьевич Федоров төрөөбүтэ 100 сылынан Тамалакаан орто оскуолатын тэлгэһэтигэр кини сырдык мөссүөнэ — бюһа үөрүүлээх быһыыга-майгыга арылынна. Тэрээһиҥҥэ Тамалакаан нэһилиэгин баһылыга Петр Иванов, улуус баһылыгын солбуйааччыта, Афанасий Игнатьевич аймаҕа Игнат Трофимов, аймах балта, Дьокуускай куораттан Люция Слепцова, аймаҕа, улуустааҕы профсойуус салайааччыта Алексей Федоров, «Далбар хотун» сурунаал бас редактора Айталина Никифорова-Шадрина уонна бары аймахтара, сыдьааннара, Тамалакаан олохтоохторо кыттыыны ыллылар. Афанасий Игнатьевич төһө да кылгас олоҕу олордор, 32 эрэ сааһыгар тиийдэр, кини кэргэнинээн үс оҕоломмуттара. Бу оҕолор атахтарыгар туран, үөрэхтэнэн билигин 10 сиэннэнэн, элбэх хос сиэннэнэн, эһэлэрин аатын, олорботох олоҕун ааттата, олоро, айа-тута сылдьаллар. Афанасий Игнатьевич кылгас олоҕун бүүс-бүтүннүү сурукка-бичиккэ анаабыта, бэйэтин кэнниттэн 100-тэн тахса айымньыны хаалларбыта. Бэл диэтэр, «Сүрэҕим хас биирдии тэбиитин суруйууга аныыбын» диэбитэ кини бюһугар көмүс буукубаларынан суруллан үйэтитилиннэ. Афанасий Игнатьевич эдэр сааһын күөрэйэр кэмигэр репрессияҕа түбэһэн хаайыыга 4 сыл олорбута, ол кэмигэр 18 айымньыны суруйан хаалларбыта. Саамай биллэр кэпсээннэрэ: “Дьылҕам миэнэ”, “Хагдарыйбат лабаалар” о.д.а. Эдэркээн сааһыгар олохтон туораабытыттан киһи хараастар, өссө да айар-тутар санаата элбэх этэ. Бюһу нэһилиэк баһылыга Петр Прокопьевич уонна аймаҕа Алексей Николаевич ытыс дохсун тыаһынан арыйдылар. Тамалакаан нэһилиэгин баһылыга Петр Прокопьевич санаатын үллэһиннэ: - Быйыл Тамалакаан нэһилиэгэ туспа нэһилиэк буолбута 35 сылыгар, киэн туттар биир дойдулаахпыт, суруйааччы Афанасий Игнатьевич Федоров 100 сааһыгар сөп түбэһиннэрэн бу бюһу үөрүүлээхтик арыйдыбыт. Кини таһыгар өссө биир дойдулаахпыт, СӨ норуодунай суруйааччыта Семен Титович Руфов бюһун эһиил, үбүлүөйдээх 100 сааһын көрсө, туруорар былааннаахпыт. Төһө да халлааммыт ардахтаах көрүстэр, суолбут алдьаннар, сарсыарда Афанасий Игнатьевич төрөөбүт алааһыгар квадроциклынан тахсаммыт мемориальнай дуоска арыйан киирдибит. Бүгүн киэһэ Афанасий Федоров айымньытынан “Сураҕа суох” испиктээкил туруоҕа, ону таһынан “Учуутал – эн үрдүк ааккынан” үөрэҕирии эйгэтигэр үлэлиир дьиэ кэргэттэр күрэстэрэ буолуо. Сарсын, бэс ыйын 19 күнүгэр, Тамалакаан нэһилиэгин ыһыаҕа сайылык баһыгар ыытыллара былааннанар. Талааннаах суруйааччы Афанасий Игнатьевич Федоров аата ааттана турдун, кини айымньыларын ааҕыҥ, үөрэтиҥ! Мария Васильева, «Үөһээ Бүлүү» хаһыат #Тамалакааннэһилиэгэ #АфанасийФедоров #Үйэлээхүбүлүөй #Урантылуустара