Бүгүн, бэс ыйын 15 күнүгэр, Россияҕа Норуоттар Сомоҕолоһууларын, Саха сиригэр Культура ... — 15 июня 2026 г. в 09:23:35.256
Бүгүн, бэс ыйын 15 күнүгэр, Россияҕа Норуоттар Сомоҕолоһууларын, Саха сиригэр Культура уонна улууспутугар Үөрэҕирии ситимэ төрүттэммитэ 150 сылларыгар аналлаах Үрүҥ Тунах ыһыахпытын тэрийэр хамыыһыйа мунньаҕын салайан ыыттым. Эрдэ биллэриллибитин курдук, нэһилиэктэр икки ардыларыгар комплекснай күрэхтэһии чэрчитинэн ыһыах икки күнүн устата 7-лии культурнай уонна спортивнай күрэхтэр ыытыллыахтара. Ол курдук, культурнай өттүгэр: «Сандаара Куо-2026», «Учуутал – эн үрдүк ааккынан!» учуутал дьиэ кэргэттэрин, саха таҥаһын, дэгэрэҥ уонна норуот ырыаларын, оһуохай, тойук күрэхтэрэ уонна быыстапкалар, онтон спортивнай чааһыгар: хапсаҕайга, хомуур хапсаҕайга, ат сүүрдүүтүгэр, Мордьонноохоп оонньууларыгар, эстафетаҕа, ох саанан ытыыга уонна атах оонньууларыгар күөн күрэстэр ыытыллан, национальнай бырааһынньыкпытын өссө киэргэтиэхтэрэ, таһымын үрдэтиэхтэрэ. Манна кыайыылааҕынан тахсыбыт нэһилиэк быйылгы ыһыах сүрүн бирииһин – «УАЗ-Хантер» микроавтобус хаһаайынынан буолуоҕа. Маны таһынан, «Газпром недра» ХЭТ спонсордаан, 2-с миэстэни ылбыт нэһилиэк 200 тыһ., онтон 3-с миэстэҕэ тахсыбыт нэһилиэк 100 тыһ. солкуобай харчынан бирииһи тутан үөрүөхтэрэ-көтүөхтэрэ. Билигин сүрүннээн бөһүөлэкпит киинигэр уонна Түгэхтэй алааспытыгар бырааһынньыктыы настарыанньаны бэлэхтиир кэрэ көстүүнү тэрийэр сыалтан, бэс ыйын 20 күнүгэр диэри бары үлэ коллективтара уонна чааһынай предпринимателлэр сыһыарыллыбыт территорияларын киэргэтэллэригэр сорудахтаатым. Бу үлэ чэрчитинэн көстүүнү буортулуур туох баар эргэрбит, хайдыбыт баннердары уонна былаахтары хомуйан, саҥардар туһугар күүскэ үлэлэһиэхтээхпит. Күндү улууспут олохтоохторо! Баар-суох бастыҥ-мааны национальнай бырааһынньыкпытыгар бары өрө көтөҕүллэн, туохтан да туора турбакка биир киһи курдук кыттыһан, Үрүҥ Тунах ыһыахпыт өргө диэри кэрэ кэпсээн, уос номоҕо буоларын курдук уратытык, таһымнаахтык ыытыаҕыҥ! Үөһээ Бүлүү улууһун баһылыга Валерий Николаев http://T.me/ValeriNikolaev #ҮрүҥТунахыһыах #Тэрээһин #Үөрэҕирии150сыла