Үөһээ Бүлүү ыһыаҕар сахалыы тыыннаах тойук күүһэ дьиэрэйдэ! — 26 июня 2026 г. в 03:36:16.700
Үөһээ Бүлүү ыһыаҕар сахалыы тыыннаах тойук күүһэ дьиэрэйдэ! Арассыыйаҕа Норуоттар Сомоҕолоһууларын, Саха Өрөспүүбүлүкэтигэр Култуура, оттон Үөһээ Бүлүү улууһугар Үөрэҕирии ситимэ төрүттэммитэ 150 сылыгар анаммыт «Үөрэх-билии биһигэ – Үөһээ Бүлүү» улуустааҕы Үрүҥ Тунах ыһыахпыт ураты тэрээһиннэриттэн биирдэстэринэн өбүгэбит сүппэт тыыннаах үгэһин үйэтитэр «Дуолан дорҕоон доллоһуйар кылыһахтаах тойугум» тойукка күөн-күрэс буолла. Бу күрэс, тойук кылыһахтаах дорҕооно саха дьонун сүрэҕэр-дууһатыгар хаһан да сүппэт тыыннаах буолуохтааҕын өссө төгүл бигэргэттэ. Күрэххэ 18 сааһыттан үөһэ саастаах биирдиилээн уонна бөлөҕүнэн толорооччулар кыттан, тойук алыптаах эйгэтин арыйдылар. 1-кы түһүмэххэ кыттааччылар бэйэлэрэ эрдэттэн бэлэмнэммит тойуктарынан кытыннылар. Кинилэр дьиҥнээх маастарыстыбаларын көрдөрөн, тойук эйгэтин муҥутуур үрдүккэ таһаардылар. 2-с түһүмэххэ тойуксуттар анаммыт тиэмэлэргэ кылыһахтаах тойуктарын тута дьиэрэттилэр. Хас биирдии тойук толорооччуга 5 мүнүүтэ бэриллэн, уһун тыыннарын, куоластарын кэрэтин, кылыһахтарын тардыытын толору көрдөрөр кыахтаннылар. Сахалыы төрүт таҥастаах буолуу ирдэнэн, тойук ытык ис хоһоонун өссө күүһүрдэн, көрөөччүлэргэ тойук кэрэтин толору тириэртэ. Кыайыылааҕы быһаарарга дьүүллүүр сүбэ кытаанах ирдэбиллэри тутуста: этиллэр тылын чуолкайа, таба тыыныыта, уһун тыына, туойар тылын ууһа, куолаһын кэрэтэ, кылыһаҕын тардыыта, сахалыы таҥаһа – бу барыта түмүгү таһаарарга олук буоллулар. Дьүүллүүр сүбэ бэрэссэдээтэлэ, СР култууратын туйгуна Евдокия Пак бу күрэхтэһиигэ 12 саҥа тойуксут уонна 4 идэтийбит тойуксут кыттыбытын бэлиэтээтэ. Саҥа кыттар тойуксуттар нэһилиэктэригэр баал аҕалалларын уонна миэстэ олохтонорун быһаарда. Бэлиэтээн эттэххэ, сорох оҕолор куоластара олус үчүгэй эрээри, тыллара-өстөрө мөлтөһүөр соҕуһа, хомойуох иһин, баалларын кыччатта. Күрэх түмүгүнэн быйылгы тойуксуттар күрэхтэрин түмүгэ маннык буолла: 3-с миэстэни – Дүллүкү нэһилиэгиттэн Наталья Егорова, 2-с миэстэни – Нам нэһилиэгиттэн Туйаара Петрова ыллылар. Онтон 1-кы миэстэни Үөһээ Бүлүү нэһилиэгиттэн Уйгулаана Гаврильева ылан, кыайыылаах үрдүк аатын сүктэ! Идэтийбит тойуксуттарга быйылгы күрэххэ 4 кыттааччы баар буолан, хас биирдиилэригэр анал ааттар туттарылыннылар: кыттыбытын иһин сэмэй бэлэх – Хаар Семеноваҕа; «Кылыгырас кылыһахтаах тойуксут» анал аат – Ульяна Александроваҕа; «Дьүрүскэн куолас» анал аат – Нам нэһилиэгиттэн Светлана Ильинаҕа; «Кутуллар тойук» анал аат – Никита Аянитовка. Күрэх биир долгутуулаах түгэнинэн Үөдүгэйдээҕи сынньалаҥ киинин уус-уран салайааччыта, СР култууратын туйгун, СР үтүөлээх этээччитэ Марианна Хобусарова тахсыыта буолла. Кини урут хаһан да туойбатах, оһуохай эппэтэх Лана Ильинаҕа быйылгы тойук күрэҕэр аан бастакытын кыттан Үөдүгэй нэһилиэгин чиэһин харса суох көмүскээбитин иһин 5000 солкуобай суумалаах сертификаты туттарда. Ону тэҥэ, оһуохай күрэҕэр 3-с миэстэтин иһин эмиэ 5000 солкуобайы туттаран, Лана дьулууругар дириҥ махталларын биллэрдэ. Бу күрэс саха норуотун ытык тойугун кэлэр көлүөнэҕэ тиэрдиигэ, үйэтитиигэ улахан суолталаах. Тойук дуолан дорҕооно Үөһээ Бүлүү түһүлгэтиттэн киэҥ сиргэ тарҕанна! Галина Васильева #ҮрүҥТунахыһыах #Тойуккүрэҕэ