Бүгүн, алтынньы 10 күнүгэр, "Кыра кыамталаах хотоннору тутуу уонна саҥардыы" бырагыраам...
Бүгүн, алтынньы 10 күнүгэр, "Кыра кыамталаах хотоннору тутуу уонна саҥардыы" бырагыраамма көмөтүнэн Үөһээ Бүлүү улууһугар бэһис хотон тутуллан үлэҕэ киирдэ! Мэйик нэһилиэгэр эдэр, дьулуурдаах фермер Потапов Александр Николаевич тэриллиилээх хаһаайыстыбата быйыл улуустааҕы "Кыра кыамталаах хотоннору тутуу уонна саҥардыы" бырагыраамма куонкуруһугар хапсан, 50 төбө батар хотонун тутан үлэҕэ киллэрдэ. Бу дьоһуннаах бырайыак олоххо киириитигэр тыа хаһаайыстыбатын сайыннарыыга анаммыт үптэн 8 687 500 солкуобай субсидия көрүллүбүтэ. Потаповтар хаһаайыстыбалара күүскэ сайдан иһэрин бэлиэтиибин. Ол курдук, 2025 сыллаахха өрөспүүбүлүкэтээҕи "Агростартап" күрэххэ кыайан, МТЗ 82.1 тыраахтыр уонна оттуур техниканы ыларга анаан 2 мөл. 125 тыһ. солкуобайдаах грант ылбыттара. Бу грант көмөтүнэн хаһаайыстыбалара кэӈээн, былырыын 47 төбө сүөһүлээх, ол иһигэр 16 ыанар ынахтаах эбит буоллахтарына, быйыл кыстыкка 62 төбө сүөһүлээх, ол иһигэр 30 ыанар ынахтаах киирэргэ бэлэмнэнэллэр. Үүт туттарыытын быйылгы былааннара 25 тонна эбит буоллаҕына, билиҥҥи туругунан 16,5 тоннаны туттарбыттар. Биир сыл иһигэр маннык үрдүк көрдөрүү – Александр Николаевич дьулуурун уонна таһаарыылаах үлэтин туоһута буолар. Мэйик нэһилиэгин кэскиллээх фермерыгар Александр Николаевичка уонна кини дьиэ кэргэнигэр инникитин даҕаны үлэҕитигэр ситиһиилэри, дьолу-соргуну, үгүс үүнүүнү, чэгиэн бигэ туругу, сайдыыны, уйгуну-быйаӈы баҕарабын! Эдэр фермердар үлэлэрэ эдэр ыччаппытыгар тыа хаһаайыстыбатыгар күүскэ үлэлииргэ, сайдарга үтүө холобур буоллуннар! Үөһээ Бүлүү улууһун дьаһалтата инникитин даҕаны тыа хаһаайыстыбатын сайыннарыыга, эдэр фермердэри өйөөһүҥҥэ бары күүһүн ууруоҕа. Ил Дархаммыт Айсен Сергеевич Николаев тыа хаһаайыстыбатын сайыннарыыга ыытар бэлиитикэтэ тыа сирин кэскиллээх олоҕун түстүүр. Тыа сирэ сайдар — улуус сайдар, өрөспүүбүлүкэ сайдар! #ВместеТолькоВперед #ТыаСирэ #ТыаХаһаайыстыбата #СельскоеХозяйство #Мэйик #ҮөһээБүлүү max.ru/channel_VNikolaev