Бүгүн, от ыйын 8 күнүгэр, улуустааҕы дьиэ кэргэн уонна ыччат отделын тэрийиитинэн И.Н. ... — 8 июля 2026 г. в 10:05:01.452
Бүгүн, от ыйын 8 күнүгэр, улуустааҕы дьиэ кэргэн уонна ыччат отделын тэрийиитинэн И.Н. Барахов аатынан болуоссакка Дьиэ кэргэн, таптал, бэриниилээх буолуу сырдык бырааһынньыгын үөрүүлээхтик бэлиэтиир дьоһун түһүлгэ ыытылынна. Манна мустубут ытык-мааны ыалдьыттары, дьиэ кэргэттэри уонна кырачааннары улуус баһылыгын бастакы солбуйааччыта Егор Иванов эҕэрдэлээн туран, Үөһээ Бүлүүбүт бастыҥ ыалларыгар наҕараадалары туттартаата. Ол курдук, «Таптал уонна бэриниилээх буолуу иһин» Российскай Федерация түөскэ анньыллар мэтээлинэн Үөдүгэй нэһилиэгиттэн Виктор Семенович, Алла Семеновна Григорьевтар, Дүллүкү нэһилиэгиттэн Михаил Иванович, Любовь Николаевна Тарасовтар, Харбалаах нэһилиэгиттэн Максим Иванович, Александра Николаевна Шестаковтар уонна Тамалакаан нэһилиэгиттэн Николай Алексеевич, Анна Васильевна Васильевтар наҕараадаланнылар. Өрөспүүбүлүкэҕэ дьиэ кэргэн сыаннастарын үрдэтэр, үтүө өрүттэрин, оҕону иитии төрүт олуктарын киэҥ эйгэҕэ билиһиннэрэр, көлүөнэ сибээһин бөҕөргөтөр, норуот үтүө үгэстэрин харыстыыр сыаллаах-соруктаах ыытыллыбыт «Сыл бастыҥ дьиэ кэргэнэ» өрөспүүбүлүкэтээҕи дьиэ кэргэн күрэҕэр иккис миэстэни ылбыт Елена Дмитриевна, Валентин Семенович Лебедкиннары истиҥник эҕэрдэлээн туран, улуус баһылыга Валерий Николаев аатыттан эҕэрдэ суругу, сибэкки дьөрбөтүн туттардылар. Салгыы эҕэрдэлииргэ тыл Үөһээ Бүлүү улууһун гражданскай турук аактатын суруйар управлениетын салайааччытыгар Татьяна Кардашевскаяҕа туһаайылынна. Кини 50 сыл устата бэйэ-бэйэҕэ ытыктабылы, тапталы, истиҥ сыһыаны өрө туппут, дьоллоох оҕо сааһы уонна кэскили кэҥэппит дьиэ кэргэттэри чиэстээн туран, «Дьиэ кэргэн килбиэнэ» анал бэлиэни Үөдүгэйтэн Валерий Васильевич, Раиса Ивановна Васильевтарга, Үөһээ Бүлүү сэлиэнньэтиттэн Иван Васильевич, Александра Владимировна Семеновтарга ытыс дохсун тыаһын доҕуһуолугар туттарда уонна "Ытык ыал" Бочуот кинигэтигэр киллэрдэ. Онтон Татьяна Егоровна Далыр нэһилиэгиттэн Светлана Афанасьевна, Пантелеймон Дмитриевич Габышевтарга "Саха сирин кыһыл көмүс ыаллара" альбом-кинигэҕэ киирбиттэринэн эҕэрдэ суругу, сибэкки дьөрбөтүн уонна сэмэй бэлэҕи туттарда. Галина Васильева #Дьиэкэргэн #Бэриниилээхбуолуу #Таптал