Бүгүн, от ыйын 6 күнүгэр, улуус дьаһалтатын мунньахтыыр саалатыгар Үөһээ Бүлүү улууһуга... — 6 июля 2026 г. в 06:19:56.025
Бүгүн, от ыйын 6 күнүгэр, улуус дьаһалтатын мунньахтыыр саалатыгар Үөһээ Бүлүү улууһугар 1975-1996 сс. СР оскуолаларын бүтэрбит выпускниктар культураҕа уонна спортка III республикатааҕы фестивалларын тэрийэр мунньах ыытылынна. Көрсүһүүнү Альберт Михайлович Соров уонна улуус баһылыгын социальнай боппуруостарга уонна дьиэ кэргэн политикатыгар солбуйааччы Анна Михайловна Уларова иилээн-саҕалаан ыыттылар. Барыта 19 выпуск бэрэстэбиитэллэрэ кэлэн, санааларын этиннилэр, этиилэрин киллэрдилэр. Мунньах саҕаланаатын кытта тыл Альберт Соровка туһаайылынна: - Атырдьах ыйын 21-22 күннэригэр Үөһээ Бүлүү улууһугар Саха сирин оскуолаларын бүтэрбит выпускниктар республикатааҕы фестиваллара ыытыллыаҕа. Манна республика бары оскуолаларын бүтэрбит выпускниктары барыларын күүтэбит. Билиҥҥи туругунан 22 выпуск хамаандата толору кэлэрдии олорор. Спортивнай көрүҥнэргэ: волейболга, буулдьанан ытыыга, дартска, эстафетаҕа, корнхолга уонна культурнай чааһыгар: ырыаҕа, үҥкүүгэ күрэхтэһиилэр ыытыллыахтара. Урукку уопуттан ылан көрдөххө, соҕотох киһи хас да көрүҥҥэ бириэмэтинэн кыамматынан, биир көрүҥҥэ булгуччу биир киһи кыттыахтаах. Культурнай көрүҥҥэ күрэхтэһиилэр фестиваль иккис күнүгэр ыытыллыахтара. Маны сэргэ бэйэҕит быыстапкаларгытын, коллекцияларгытын аҕалан туруоруоххутун сөп, төһө кыалларынан айымньылаахтык сыһыаннаһыаҕыҥ! Билиҥҥэттэн группаларда арынан, тэрээһин үлэтин ыытан барыҥ. Күндү выпускниктар, бэйэбит үөрүүбүтүн бэйэбит эрэ оҥорорбут быһыытынан, ким да туора туран хаалбакка, фестивальбытын үрдүк таһымнаахтык ыытыаҕыҥ диэн ыҥырабын! Билигин тэрээһиҥҥэ саамай тирээн турар боппуруоспутунан ыытар сирбит буолар. Үҥкүүһүттэр площадкаларын дириҥин, киэҥин көрүөхпүтүн баҕарабыт, Тоҕо диэтэр, ханнык эрэ выпуск, баҕар, 30 киһилээх тахсан үҥкүүлүөн сөп. Онтон тылы Анна Уларова эттэ: - Тэрээһин программата оҥоһулла турар. Фестиваль «Түгэхтэй» алаас «Алгыс» түһүлгэтигэр стадиоҥҥа буолуоҕа. Выпускниктар Аал Луук мастан парадтаан түһүөхтэрэ. Мессенджерга группалар от ыйын 11 күнүгэр диэри бары арыллыахтаахтар. Ыһыах курдук, подкомиссиялар тэриллэн, хорчуоппа, транспортнай комиссия, онтон да атын эппиэттээх салаалар бары үлэлиэхтэрэ. Атырдьах ыйын саҥатыгар тэрээһин мунньаҕын өссө ыытыахпыт. Палаточнай городок Кыырт Далыгар буолуоҕа, аһылык - балаҕаҥҥа. Спорт 5 көрүҥэ бары Түгэхтэйгэ ыытыллыахтара. Бүгүҥҥү мунньахтан көстөрүнэн, выпускниктар көхтөрө олус үрдүк, бэл, хайа эрэ түгэҥҥэ мөккүһэн ыллылар. Онон фестивальбыт муҥутуур үрдүк таһымҥа барарыгар эрэниэҕиҥ! Галина Васильева #Фестивальвыпускников2026 #Сахасиринвыпускниктара