🌾Кырыкыйга ходуһа ахсын көхтөөх от үлэтэ күөстүү оргуйар. Хотуур тыаһа хоҥкунуур, тиэх... — 29 июля 2026 г. в 07:31:53.750
🌾Кырыкыйга ходуһа ахсын көхтөөх от үлэтэ күөстүү оргуйар. Хотуур тыаһа хоҥкунуур, тиэхиньикэ тыаһа бирилиир. Маннык үлэ күүрүүлээх долгунугар куустаран, от үлэтин бары сатабылларын иҥэринэн оҕотуттан оҕонньоругар тиийэ бу күннэргэ от үлэтин инники күөҥҥэ туталлар. Биир бастакынан ходуһаҕа - Кырыкый тыатын хаһаайыстыбатын исписэлииһэ Николай Григорьев тахсыбыта. Кини төбөнөн 60 сүөһүлээх, онтон ыанар ынаҕа -27. Уолунаан, сиэннэринээн кыстык оту бэлэмнээһиҥҥэ күүстээх үлэҕэ сылдьаллар. Ону таһынан быраата, уола, сиэннэрэ ынах ыаһан үрүҥ илгэни үрүлүтэллэр. Үлэҕэ бэрт кыра эрдэхтэриттэн эриллэн күн бокуойа суох олоххо бэлэмнээх, үгүс сатабыллаах дьон буола улааталлар. "От үүнүүтэ үчүгэй, халлаан туран биэрдэр, кыраны оттуур дьон бүтүөх этилэр. Элбэх от охсуллан сытар. Бэҕэһээҥҥиттэн күүстээх мунньуу, кээһии, рулоннааһын үлэтэ бара турар. 50 туонна кэбиһии рулон буолла. Дойдубут дьоно бары от үлэтигэр күргүөмнээхтик тахсыбыттара. Уматык боппуруоһун биһиэхэ саас эрдэ быһаарбыттара. Тарированнай канистралаахпыт, "Саханефтегаз" АУо тэрилтэни кытары дуогабардаһан сыл аайы суола - ииһэ мөлтөх нэһилиэктэргэ улуус дьаһалтата, нэһилиэкпит баһылыга аҕалтарар буолан, нэһилиэк тыа хаһаайыстыбатынан дьарыктанар дьоно абыранабыт. Онон кинилэргэ махталбыт муҥура суох. Бары күүһү - окко ! Окко былааммыт - 800-900 туонна . Халлаан туран эрэ биэрдэр, тыа сирин чэрдээх илиилээх үлэһит дьоно толоруохпут,- диэн от үлэтин үгэнигэр сылдьар Кырыкый нэһилиэгин тыатын хаһаайыстыбатын исписэлииһэ Николай Николаевич быһа гыммакка, быыс булан санаатын үллэһиннэ. Үгүс үлэни- хамнаһы үмүрү тутар үгэстээх удьуор үлэһит дьонноох уонна айылҕаттан спортсменнар, тустууктар уутуйан үөскээбит дойдуларыгар - Кырыкыйга ходуһа ахсын бастыҥ хаачыстыбалаах оттор бачыгыраатыннар, тиэргэн ахсын кээһиилээх дьоһун оттор кэчигирээтиннэр! Тыа хаһаайыстыбатын управлениетын пресс- киинэ #Оттооһун #Тыахаһаайыстыбата