Үөһээ Бүлүү улууһугар Аан дойдутааҕы аҕам саастаах дьон декадата үөрүүлээхтик арылынна.
Үөһээ Бүлүү улууһугар Аан дойдутааҕы аҕам саастаах дьон декадата үөрүүлээхтик арылынна. Бүгүн Үөһээ Бүлүү улууһугар Аан дойдутааҕы аҕам саастаах дьон декадата үөрүүлээх быһыыга-майгыга арылынна. Бу дьоһуннаах тэрээһин, улууспут ытык-мааны кырдьаҕастарыгар дириҥ ытыктабылбытын уонна махталбытын биллэрэр, кинилэр олоххо киллэрбит сүҥкэн кылааттарын үрдүктүк сыаналыыр суолталаах. Декада алтынньы 10 күнүгэр диэри ыытыллыаҕа уонна аҕам саастаах дьон чэгиэн туруктарын бөҕөргөтүүгэ уонна уопсастыба олоҕор көхтөөхтүк кыттарыгар анаммыт араас тэрээһиннэри хабыаҕа. Тэрээһин былаана: • Спортка: "Үс Хоһуун" спорт комплекска аҕам саастаах дьоҥҥо аһаҕас, көҥүл дьарыктар ыытыллыахтара. Ону таһынан, дуобакка, шахматка күрэхтэр, дартска, корнхолга уонна булдьанан ытыыга араас күрэхтэһиилэр тэриллиэхтэрэ. • Култуура уонна билии: Үөһээ Бүлүүтээҕи этнография түмэлигэр анал экскурсиялар, улууспут киин бибилэтиэкэтигэр араас мастер-класстар уонна умсугутуулаах экскурсиялар ыытыллыахтара. • Социальнай өйөбүл: "Работа России" нэһилиэнньэ дьарыктаах буолуутун киинигэр уонна социальнай пуондаҕа аҕам саастаах дьоҥҥо көрүллэр өйөбүллэргэ анаммыт консультациялар буолуохтара. Бүгүҥҥү декада үөрүүлээх арыллыытын чэрчитинэн, аҕам саастаах дьоммутугар улууспут дьоҕурдаах эдэр ыччата ырыа-тойук, үҥкүү-битии аргыстаах дьоһуннаах концерт бэлэх ууннулар. Бу күнү өссө сырдык уонна үөрүүлээх гына түмүккэ оһуохай түһүлгэтэ тэрилиннэ, уонна Чэй церемонията ыытылынна. Улуус дьаһалтата бары аҕам саастаах дьоммутугар чэгиэн-чэбдик туругу, уһун үйэни, дьолу-соргуну баҕарар уонна декадаҕа көхтөөх кыттыыны ылыӈ диэн ыӈырар. #ДекадаПожилыхЛюдей