“Уостубат үлэ умсулҕана”: Үөһээ Бүлүү уһуйааччыларыгар дьоһуннаах кинигэ сүрэхтэннэ
“Уостубат үлэ умсулҕана”: Үөһээ Бүлүү уһуйааччыларыгар дьоһуннаах кинигэ сүрэхтэннэ Үөһээ Бүлүү киин ааҕар дьиэтигэр улуус үөрэҕириитин 150 сылын үбүлүөйүн чэрчитинэн, «Уостубат үлэ умсулҕана» диэн ааттаах саҥа кинигэ дьоро сүрэхтэниитэ буолла. Бу кинигэ Үөһээ Бүлүү улууһун бастыҥ үлэлээх, бэриниилээх уһуйааччы-учууталларыгар анаммыт дьоһуннаах үлэ буолар. Кинигэни Саха Өрөспүүбүлүкэтин үөрэҕириитин туйгуна, Арассыыйа Федерациятын үөрэҕин эйгэтин Бочуоттаах үлэһитэ Наталья Николаевна Иванова хомуйан таһаарда. Кинигэ ис хоһооно алын сүһүөх кылаас учууталларын уостубат үлэлэрин, олоххо дьулуурдарын, айылҕаттан айдарыылаах талааннарын сырдатар уонна үйэтитэр. Кинигэ тупсаҕай оҥоһуулаах, көмүс оһуордаах буолан, харахха быраҕыллар. Тэрээһиҥҥэ Үөһээ Бүлүү улууһун дьаһалтатын ыччат уонна дьиэ кэргэн политикатын отделын специалиһа Зоя Моисеевна Колосова уонна улуустааҕы үөрэх салалтатын начальнига Леонид Николаевич Огочонов махтал сурук, грамота туттардылар. «Дани – Алмас» типографияҕа 76 сирэйдээх, 80 ахсааннаах бэчээттэнэн тахсыбыт кинигэ сүрдээх тупсаҕай, сиэдэрэй оҥоһуулаах. Халыҥ переплеттаах, тас көстүүтэ көмүс оһуордаах, аата эмиэ көмүс буукубаларынан киэркэйбит. Бу – кинигэ дьоруойдара, биһиги учууталларбыт үлэлэрин уонна кэрэ олохторун кэрэһэлиир сүрэхтэн тахсар бэлэх. Кинигэҕэ киирбит учууталларга анаан Наталья Николаевна минньигэс тордунан күндүлээн мустубут дьону үөрдэ-көтүттэ. «Уостубат үлэ умсулҕана» кинигэ кэлэр көлүөнэ ыччаттарга чулуу учууталлар үлэлэрин дьиҥнээх туоһута буолуоҕа.