РФ Бырабыыталыстыбатыгар саҥа уларыйыылар: Олег Кожемяко Уһук Илиҥҥи федеральнай уокуру...
РФ Бырабыыталыстыбатыгар саҥа уларыйыылар: Олег Кожемяко Уһук Илиҥҥи федеральнай уокурукка РФ Бэрэсидьиэнин боломуочуйалаах бэрэстэбиитэлин дуоһунаһыгар ананарыгар этии киирдэ РФ Бырабыыталыстыбатын бэрэссэдээтэлэ Михаил Мишустин бэрэсидьиэн Владимир Путиҥҥа бырабыыталыстыбаҕа саҥа хандьыдааттары талыыга этии киллэрдэ. Ол курдук, РФ Бырабыыталыстыбатын бэрэссэдээтэлин солбуйааччы — Уһук Илиҥҥи федеральнай уокурукка РФ Бэрэсидьиэнин боломуочуйалаах бэрэстэбиитэлин дуоһунаһыгар Приморскай кыраай губернатора Олег Кожемяко этилиннэ. 2013 сылтан бу дуоһунаска Юрий Трутнев үлэлиир. Кини Бырабыыталыстыба Бэрэссэдээтэлин солбуйааччы дуоһунаһын Уһук Илиҥҥи федеральнай уокурукка РФ Бэрэсидьиэнин боломуочуйалаах бэрэстэбиитэлин боломуочуйаларын кытта дьүөрэлээн, бэрэсидьиэн уустук сорудахтарын чаҕылхайдык толорбутун Михаил Мишустин уонна Владимир Путин көрсүһүүлэригэр бэлиэтэннэ. Бэрэсидьиэн дойдуга саамай суолталаах соруктарынан сорудахтыаҕа. Маны таһынан, РФ Бырабыыталыстыбатын Бэрэссэдээтэлин солбуйааччы — аппараат салайааччытын дуоһунаһыгар Үп миниистирин бастакы солбуйааччы Ирина Окладникова этилиннэ. Бырабыыталыстыба Бэрэссэдээтэлин солбуйааччынан тырааныспар миниистирэ Андрей Никитин буолуоҕа, ол иһигэр кини тырааныспар комплексын сайыннарыытын сүрүннүөҕэ. Дойду бырабыыталыстыбатыгар саҥа дуоһунас — Бырабыыталыстыба Бэрэссэдээтэлин солбуйааччы — Үп миниистирэ баар буолуоҕа. Бу дуоһунаска Үп миниистирэ Антон Силуанов аата хандьыдаат быһыытынан этилиннэ. Тырааныспар миниистиринэн Росавиация баһылыга Дмитрий Ядрову туруорарга этии киирдэ. Хаартыска: Приморскай кыраай бырабыыталыстыбатын пресс-сулууспата