🌺 “Өлкәннәр” клуб берләшмәсе җитәкчесе Габит Фәрхетдиновның юбилей кичәсе узды — 28 августа 2026 г. в 07:56:41.471
🌺 “Өлкәннәр” клуб берләшмәсе җитәкчесе Габит Фәрхетдиновның юбилей кичәсе узды 🌺 Саба үзәк китапханәсендә матур бер чара узды - “Өлкәннәр” клуб берләшмәсе җитәкчесе Габит Фәрхетдиновның юбилей кичәсе “Хикмәт, тәҗрибә һәм каләм” исеме астында оештырылды. 🌺 Бәйрәмгә юбилярның якыннары, дуслары һәм танышлары җыелды. Кичәне матур итеп бизәүдә район мәдәният йорты хезмәткәрләре зур өлеш кертте. Татарстан Республикасының атказанган мәдәният хезмәткәре Энҗе Нурисламова, Гөлзилә Нурмөхәммәтова, баянчы Айнур Габделхаков, шулай ук “Өлкәннәр” берләшмәсе активисты Илшат Мухәммәтшин музыкаль чыгышлары белән бәйрәмгә үзенчәлекле бизәлеш өстәделәр. 🌺 Чарада район китапханәчеләре тарафыннан юбилярның шигырьләре яңгырады. Ветераннар советы җитәкчесе Альфред Назипович, район инвалидлар җәмгыяте рәисе Әмин Ибрагимович һәм башка күпсанлы кунаклар җылы котлау сүзләре әйттеләр. Татарстанның атказанган укытучысы Гөлнәзирә Мөдәрисовна яшьлек хәтирәләре белән уртаклашып һәркемне үткәннәргә алып кайтты. 🌺 Кичәне йомгаклап, Саба үзәкләштерелгән китапханәләр системасы директоры Билалова Ләйсән Рәкыйп кызы юбилярга җылы теләкләрен юллады һәм истәлек бүләген тапшырды. Бу очрашу барлык катнашучыларга да якты хатирәләр калдырды.