🍃🎭 Руслан Тараховскай салалтатынан республика театрдара Олоҥхо ыһыаҕын бэлэмнииллэр — 1 июля 2026 г. в 03:54:11.123
🍃🎭 Руслан Тараховскай салалтатынан республика театрдара Олоҥхо ыһыаҕын бэлэмнииллэр Сахабыт сирин саамай күүтүүлээх уонна суолталаах тэрээһинэ Олоҥхо ыһыаҕа быйыл Кэбээйи сиригэр-уотугар өрөспүүбүлүкэ театрдарын айар күүһүн түмэр улахан түһүлгэҕэ кубулуйуоҕа. Бу өрөгөйдөөх Саха төрүт бырааһынньыгын култуурунай чааһын уонна сүрүн туруорууларын бэлэмнээһиҥҥэ Саха сирин театральнай түһүлгэтин бары кэлэктииптэрэ биир сомоҕо буолан үлэлииллэр. Ыһыах саамай эппиэтинэстээх өттүн аһыллыы сиэрин-туомун Саха театрын сүрүн режиссера Руслан Тараховскай туруорар. Кини салалтатынан араас театрдар маастардара, артыыстара уонна үлэһиттэрэ Олоҥхо тыынын, саха норуотун төрүт үгэстэрин театральнай дьүһүйүүнү кытта дьүөрэлээн, көрөөччүгэ ураты туругун бэлэхтиэхтэрэ. Онтон ыһыах үрдүк таһымнаахтык түмүктэниитин Олоҥхо театрын сүрүн режиссера Роман Дорофеев иилээн-саҕалаан оҥоруоҕа. Маны тэҥэ үөрүүлээх аһыллыы, сабыллыы техническай өттүн, декорациятын уонна сүрүн хааччыллыытын Саха театрын артыыһа Илья Стручков салайар. Бэҕэһээ режиссердар, кинилэр көмөлөһөөччүлэрэ уонна постановочнай чаас бөлөҕө мустан, СӨ култуураҕа миниистирин бастакы солбуйааччыта Мария Турантаева салайыытынан, аһыллыы туруоруутун сиһилии ырыттылар. Мунньахха бүтэһик түһүмэхтэр, артыыстар тахсыылара, хас биирдии чаас ис хоһооно чопчуланна. Быйылгы Олоҥхо ыһыаҕа Саха сирин бары театральнай кэлэктииптэрин түмэн дьиҥнээх норуот айымньыта уонна үрдүкү искусство ситимэ буолан, сүүһүнэн сылларга салҕанан кэлбит өбүгэлэрбит алгыстаах тыыннарын хас биирдии ыалдьыкка иҥэриэҕэ.