🎭👏🏻 Аллараа Бэстээххэ В.В. Местников аналаах «Сөргүтүү. Сүгүрүйүү. Сайдыы» бырайыак ...
🎭👏🏻 Аллараа Бэстээххэ В.В. Местников аналаах «Сөргүтүү. Сүгүрүйүү. Сайдыы» бырайыак ааста: Саха театра уонна олохтоох култуура киинэ бииргэ үлэлээһиҥҥэ илии баттастылар Алтынньы 9 күнүгэр Аллараа Бэстээх бөһүөлэгэр СССР норуодунай артыыһа В.В. Местников аатынан култуура киинигэр «Сөргүтүү. Сүгүрүйүү. Сайдыы» диэн уһулуччулаах режиссер олоҕор уонна айар үлэтигэр аналлаах бырайыак ситиһиилээхтик ыытылынна. Тэрээһиҥҥэ Былатыан Ойуунускай аатынан Саха академическай театрыттан СӨ норуодунай, Россия үтүөлээх артыыһа Анатолий Николаев, артыыс Николай Протасов, театровед Надежда Осипова уонна театр тэрийэр салаатын салайааччыта Ньургуйаана Илларионова кыттыыннылар. Василий Васильевич айар үлэтин сүрүн чыпчаала - «Ньургун Боотур» операны туруоруута буолар. Ол чэрчитинэн, тэрээһиҥҥэ Суорун Омоллоон аатынан Опера уонна балет театрыттан СӨ норуодунай артыыстара Владимир Заболоцкай, Александр Емельянов, Николай Попов, Ангелина Дьяконова уонна концертмейстер Александра Трофимова ыалдьыттаатылар. Үөрүүлээх арыллыыга Николай Протасов Өксөкүлээх Өлөксөй «Өй уонна сүрэх мөккүөрүн» толорон, дьон биһирэбилин ылла. Онтон салгыы опера артыыстара «Ньургун Боотур» операттан быһа тардыылары толорон, мустубут дьон болҕомтотун тартылар. Ону тэҥэ, В.В. Местников айар үлэтин киэҥ эйгэҕэ тарҕатыыга, билиһиннэриигэ уонна үөрэтиигэ аналлаах төгүрук остуол истиҥ быһыыга-майгыга ааста. Манна өрөспүүбүлүкэ култууратын эйгэтин тэрилтэлэрэ уо.д.а. көхтөөхтүк кытыннылар. Тэрээһин түмүгүнэн, Саха театра уонна култуура киинэ бииргэ үлэлиир туһунан сөбүлэһиигэ илии баттаатылар. Салайааччылар бу олус кэскиллээх бырайыакка ыҥыран, үйэтитии уонна сөргүтүү үлэтин бииргэ ыытарга кэскиллээҕин бэлиэтээтилэр уонна култуура киинин дириэктэригэр Ирина Назароваҕа махталларын тиэртилэр.