СН

✥Сунтаар нэһилиэгэ✥

Госорганы и учреждения · 1 сентября 2026 г.

Открыть канал в MAX

Балаҕан ыйын 1 күнүгэр “Биир Ньыгыл Арассыыйа” Сунтаардааҕы салаатын быыбар иннинээҕи ш...

Балаҕан ыйын 1 күнүгэр “Биир Ньыгыл Арассыыйа” Сунтаардааҕы салаатын быыбар иннинээҕи штабыгар Ил Түмэн депутата Афанасий Постников, штаб салайааччыта Павел Григорьев, Сунтаар нэһилиэгин баһылыга Эдуард Филиппов уонна Сунтаар улууһун депутата Жанна Макарова Сунтаардааҕы баһаары утары этэрээт, лесничество уонна гимназия үлэһиттэрин кытта көрүстүлэр. Павел Анатольевич кэлбит дьоҥҥо штаб үлэтин, буолаары турар быыбары, сабаҕалааһыннары кэпсээн көрсүһүүнү бэрт сэргэхтик саҕалаата. Афанасий Васильевич Ил Түмэн депутатын быһыытынан үлэтин-хамнаһын ымпыктарын сырдатта. Федеральнай координатор буоларынан “Дьиэ кэргэн” национальнай бырайыак туолуутун кэтээн көрөр эбээһинэстээҕин, бу бырайыагынан өрөспүүбүлүкэҕэ, улууска социальнай суолталаах элбэх үлэ барбытын кэпсээтэ.  Сунтаар улууһугар кэлэн туох үлэ барарын, туох кыһалҕалаах боппуруостар баалларын кэлэн билсэ турар улууспут Ил Түмэҥҥэ депутата салгыы “Биир Ньыгыл Арассыыйа” бу соторутааҕыта бигэргэппит “Норуот бырагыраамата 2.0” барылыгар дойду олохтоохторуттан 3,5 мөл. этии киирбитин этэн аһарда. Билэрбит курдук, партия 2021 с. ылыммыт бу бырагырааматынан 5 сыл иһигэр араас национальнай бырайыактар үтүө түмүктээхтик үлэлээн дойдубутугар араас таһымнаах тутуулар ыытыллыбыттара. Бүгүҥҥү көрсүһүүгэ саҥа бигэргэммит “Норуот бырагыраамата 2.0” эмиэ оннук түмүктэри ыларыгар улахан эрэл баара этилиннэ. Дойду бэрэсидьиэнэ Владимир Путин тэрийсибит “Биир Ньыгыл Арассыыйа” партиятын маныаха тирэх буолар диэн эрэллээхтик эппитин Афанасий Васильевич тыл этэригэр ахтан ааста. Салгыы Сунтаар нэһилиэгин баһылыга Эдуард Егорович Госдуума быыбарыгар биир мандааттаах уокуруктан кандидат Петр Шамаевы бойобуой табаарыс быһыытынан улаханнык ытыктыырын, “анал байыаннай дьайыы хонуутугар бииргэ сылдьан эппиэтинэстээҕин билбитим, уустук түгэҥҥэ киһи бииргэ сылдьар, эрэнэр киһитэ эбит диэн ылыммытым. /.../ Үлэһит быһыытынан тылын-өһүн тиэрдэр толору кыахтаах уол диэн эрэллээхтик этэр кыахтаахпын” диэн эттэ. Күн бүгүн үлэлэһэ олорор партиябытын өйүөххэ наада диэн түмүктээтэ. Жанна Петровна партия ыытар үлэтин көмөтүнэн Сунтаар нэһилиэгэр элбэх ситиһиллибитин Киин болуоссат, “Экологтар сквердэрэ” тутуллуутун холобуругар кэпсээтэ. Бу былаһааккалар тутуллалларыгар куоластааһыҥҥа Сунтаардар түмсүүлээхпитин олус сөхпүттэрин этэн туран, бу буолар быыбарга эмиэ оннук түмсэн “Биир Ньыгыл Арассыыйаҕа” куоластаан, салайааччыларбытын өйүүрбүтүгэр, салгыы улууспут туһугар туруорсар үлэни чэпчэтэргэ ыҥырда.   Көрсүһүүгэ кэлбит дьон долгутар боппуруостары биэрдилэр, тус санааларын этиннилэр. Ол курдук, доруобуйа харыстабылын эйгэтигэр суһал көмө тиэхиньикэтэ Сунтаар нэһилиэгэр аҕыйаҕын, исписэлиистэр тиийбэттэрин, манна туох үлэ барарын ыйыттылар. Афанасий Постников маныаха эһиил балыыһа иккис уочараттаах тутуута саҕаланыахтааҕын, оччотугар “центральная районная больница 2-й категории” диэн таһыма үрдээн, базата, каадырынан хааччыллыыта биллэ улаатыаҕын эттэ. Маны таһынан мунньах кыттыылаахтара уот төлөбүрүн диапазонунан араарыы боппуруоһун көтөхтүлэр. Афанасий Васильевич манна депутаттар, өрөспүүбүлүкэ улууһун баһылыктара кэмигэр туруорсан эрдэ ылыллыбыт диапазону улаатыннарары ситиспиттэрин кэпсээтэ. Көрсүһүү түмүгэр кэлбит дьонтон үгүстэрэ бу уустук кэмҥэ, дойдубутун аан дойду барыта кэтээн олорор күннэригэр, сомоҕолостохпутуна сатанар, дойдубут туһа диэн тыыннарын кэрэйбэккэ анал байыаннай дьайыыга сылдьар уолаттарбытын таҥнарбыт курдук санаммат инниттэн, дойдубут туһугар партиябытын өйүөҕүҥ диэн санааларын үллэһиннилэр.