Телебездән төшеп калган сүзләрне бүген дә барлыйсы иттек. Бүгенге сүзебез кайчандыр янч...
Телебездән төшеп калган сүзләрне бүген дә барлыйсы иттек. Бүгенге сүзебез кайчандыр янчыкны белдерү өчен кулланылган гомумтөрки тамырлы *калта* сүзе. *Калта* ХХ гасыр башларына кадәр барлык сөйләшләребездә дә диярлек бик актив кулланылышта йөргән лексик берәмлегебез. Ә менә Себер, Әстерхан, Казан артында яшәгән милләттәшләребез телендә бу атама ХХ гасыр ахырында да әле булган. Борынгы заманнарда *калта* дип, башлыча, тиредән, тора-бара күннән эшләнгән акча янчыгын гына атаганнар. Вакытлар узу белән *калта* бар төрле янчыкларны да белдерә башлаган. Хәзерге көндә исә янчык сүзе активлашып, бу атамабызны телебездән тулысынча кысрыклап чыгарган дияргә мөмкин. "Рус теленең этимологик сүзлеге"н төзегән танылган лингвист Максимилиан Романович Фасмер рус телендә шулай ук янчык, сумка мәгънәсендә кулланылган *калита* сүзен төрки татар теленнән кергән дип исәпли. Бу сүзебез дә ачык яңгырашлы, әйтергә җайлы һәм кыска лексик берәмлегебез. Бәлки ипләп кенә куллана башларбыз? #архаик_сүз #тарихи_сүз