"Чаян" журналының 1980 нче елларда чыккан номерларын барлауны дәвам итәбез. Совет чорын...
"Чаян" журналының 1980 нче елларда чыккан номерларын барлауны дәвам итәбез. Совет чорында төрле завод, фабрика эшчеләрен, ВУЗ, СУЗ студентларын бәрәңгедән тыш кәбестә алырга да республиканың әллә кайсы районнарына командировкага җибәрә торганнар иде. Кәбестә уңышын җыю сентябрь ахыры, октябрь башларына туры килә иде. Кәбестә тауларын күбебез хәтерли торганнардыр әле. Әлбәттә, ул кәбестәләрнең барысы да яшелчә базаларына кереп урнашырга өлгерми, басуларда өелгән килеш кала торганнар иде. Бүгенге карикатура нәкь шул хакта сөйли дә. Ул чорлардагы бу хәлләрнең сәбәбе - яшелчә саклау корылмаларының азлыгы, булганнарында да саклау технологияләренең шактый түбән сыйфатлы булуыдыр, мөгаен. Ләкин ничек кенә булмасын, яшелчә кибетләрендә килосы 8-10 тиенлек кәбестәләр һәрвакыт бар иде. Дөрес, алар чери башлаган яфракларын әллә ничә кат алганга күрә язга бик кечерәеп калалар иде. Студентлар, эшчеләр ашханәсендә иң очсыз, бәясе бары тик 3-9 тиен тирәсе генә булган кәбестә салаты да һәрдаим була иде. Бу карикатура сездә 1980 еллар тормышына бәйле тагын нинди хатирәләрне яңартты? #вакытлы_матбугат