Талаан норуокка баар диэн мээнэҕэ этиллибэт. Бүгүн "Таатта" түмэлигэр Ф.С.Аргунов аатын... — 30 мая 2026 г. в 11:36:57.250
Талаан норуокка баар диэн мээнэҕэ этиллибэт. Бүгүн "Таатта" түмэлигэр Ф.С.Аргунов аатынан Оҕо искусствотын оскуолатын уһуйааччыта Любовь Владимировна Романова уонна кини үөрэнээччилэрэ быйылгы үөрэх дьылын түмүктүүр уруоктарыгар түмүстүлэр. Любовь Владимировна Намнааҕы педагогическай колледжы бүтэрэн, оскуола оҕолорун сэргэ улахан дьону эмиэ үөрэтэр. Алтынньы ыйтан саҕалаан нэдиэлэҕэ иккитэ улахан дьону уруһуйга дьарыктыыр. Бүгүн үс үөрэнээччитиниин Д.В. Поповалыын, А.А.Баишевалыын, В.Ю.Сидоровалыын 83 үлэни быыстапкалаан, сайыҥҥы былааннарын кэпсэттилэр. Кыргыттар графика, акварель көрүҥнэригэр, ардыгар пленэргэ айыллан тахсыбыт олус табыллыбыт үлэлэрин көрдөрдүлэр. Учуутал идэлээх Дария Васильевна Попова хас биирдии уруокка оҥорбут үлэлэрин сыа – сым курдук тутан, кичэллээхтик харайарын сэргии көрдүбүт. Дария Васильевна оскуолаҕа кыра кылаастарга уруһуй уруогар В.В.Сивцев уруоктарыгар уруһуйдьут ини -бии Жегусовтары кытта тэҥҥэ үөрэммит. Кинилэр талааннарын холобурдарыгар уруһуйга интэриэһэ үөскээбит. Билигин Любовь Владимировна салайыытынан уруһуй араас кистэлэҥнэрин арыйар. Эргиччи таланнаах Аграфена Алексеевна Баишева ииһи, үҥкүүнү тэҥэ уруһуйдуур баҕата баһыйан, Л.В.Романова уруһуй кылааһыгар суруттарбыт. Кини сөбүлүүр дьарыгар бириэмэ булан, кыһын устата биир санаалаахтарын кытта оскуола кыараҕас кабинетыгар күннээҕи кыһалҕаны умнан кэрэ эйгэтигэр айанын саҕалаабыт. Бастаан утаа харандааһы сатаан да туппат дьон, акварель кыраасканан уруһуйдуурга үөрэммит. Онтон иитээччи Вера Юрьевна Сидорова оҕо сааһыттан иллюстрациялаах кинигэлэри үтүктэн уруһуйдуур, устудьуоннуур сылларыгар араас офромлениелары, методическай матырыйааллары оҥорор эбит. Л.В.Романова үөрэх арыйарын истэн, тута суруттаран, билигин графикаҕа бастакы хардыыларын чиҥнээхтик оҥорор. Аны түөрт сылынан уһуйааччы Любовь Владимировна үөрэнээччилэригэр уруһуй кылааһыгар үөрэммиттэрин туһунан туоһу суругу туттарыаҕа. Киниэхэ уонна бастакы үөрэнээччилэригэ айымньылаах үлэни баҕарыаҕыҥ.