Зәринәнең дус кызы Айгөл белеме буенча психолог. Ничек кенә ярдәм итергә тырышмады ул а... — 9 января 2026 г. в 22:07:17.921
Зәринәнең дус кызы Айгөл белеме буенча психолог. Ничек кенә ярдәм итергә тырышмады ул ахирәтенә! "Син кечкенәдән үзеңне әтиеңә кирәкмәгән бала итеп кабул иткәнсең, әтиең сине яратса да, хатынын узып, сиңа тиешле дәрәҗәдә яратуын җиткерә алмаган. Сиңа бу ситуацияне үзгәртергә кирәк, син бит чибәр, булдыклы хатын-кыз, син бит бердәнбер яраткан никахлы, законлы хатын булырга лаек" дип, үзенә терапияга чакырып, күпме китаплар тәкъдим итсә дә, Зәринә тормышын үзгәртә алмады. Әйе, ул китаплар да укыды, Айгөлнең киңәшләрен дә тыңлады, балачактагы күңел яраларыннан арынырга тырышты, ниндидер хакыйкатькә дә төшенде, үзе өчен ачышлар ясады, тик шуннан ары узмады. Айгөл дә кеше үзе үзгәрергә, тормышын үзгәртергә теләмәсә, аңа ярдәм итеп булмаячагын аңлады, Зәринәне ничек бар шулай кабул итеп, акыл өйрәтми башлады. Ирекнең эшләре гөрләп барды. Аның әллә ничә шәһәрдә бизнесы гөрләп эшләде. Акча эшләп кенә калмады, хәйриячелек белән дә шөгыльләнде, кешеләргә ярдәм итте. Аны күпләр яхшы яктан искә алды, ә кемдер аны уйнашчы ир икән дип, гайбәтен сөйләде. Ни дисәң дә, ул башкаларны чәйнәп кенә утырган кешеләрдән өстен иде. Ничек тели, шулай яши. Өенә кайтса, хатыны, балалары көтеп тора, башка шәһәргә барса, анда да күңелен күрүчеләр табылды. Әмма әтиле килеш әтисез үскән баласы Зәринәдә генә иде. Хатыны, сөяркәләре, балалары бернинди мохтаҗлык күрми яшәделәр. Хатыны Нәфисә Ирекнең тугры ир түгел икәнен күптән аңлаган иде инде. Күңелендә нәрсәдер каршы килеп маташса да, ул моңа күнде. Иң мөһиме - гаиләне тәэмин итә, мохтаҗлык кичермиләр, балалары тулы гаиләдә үсә. Аның сөяркәләрен эзләп, дәрәҗәсен төшереп йөрмәячәк иде Нәфисә. Ни генә булмасын, Ирекнең никахлы, законлы хатыны, гаиләдә туган 3 баласының әнисе бер генә, ул - Нәфисә. Кеше алдында ул бай, ихтирамлы хатын. Аңардан күпләр көнләшә, күпләр аның тормышына кызыга. Ә калганы аны кызыксындырмый. Ирекнең эшләре гөрләп баруында ул аның сөяркәләренең дә берникадәр өлеше бар икәнен аңлый иде. Ни дисәң дә, шул тиклем бизнес белән идарә итәр өчен күп энергия кирәк, һәм ул энергияне ул башка хатын-кызлардан да ала. Бер караганда, рәхмәтле дә иде әле Нәфисә аларга. Аның шулай җитеш тормышта яшәвенә ул хатыннарның да өлеше бар, димәк. Алар барысы да бер көймәдә. Тормыш үз җаена ага бирде. Зәринәнең дә кызы үсеп җитте. Ирек 50 яшендә йөрәк өянәгеннән вафат булды. Зәринәгә ул матурлык салоны ачып биргән иде, үз көнен күрергә аның кереме җитте. Кызы кияүгә чыкты. Бик матур яшиләр. Ни дисәң дә, Зәринә кебек кимсенеп үсмәде шул кызы, аның әнисе дә, килеп-китеп йөри торган булса да, әтисе дә бар иде. Шуңа да үзен матур тормышка, үзенә карата яхшы мөнәсәбәткә лаек булуын тоеп үсте. Зәринә дә бит аңа үзенә җитмәгән назны да бирергә тырышты. Максатына иреште сыман. Бүген инде ул зәвыклы киенгән, сылулыгын җуймаган, сөйкемле хатын-кыз гына түгел, дәү әни дә. Дөрес яшәлдеме икән? Әйтә алмый Зәринә әлегә. Шулай да рәхмәтле ул язмышына. Иреккә дә рәхмәтле. Зәринә аны чын күңелдән яратып яшәде, кызлары да чын мәхәббәттән туды. Тормышта нәрсә генә булмасын, бар да яхшыга, дип яши бүген Зәринә. Дилбәр Исраева