Әгәр сүзен бик еш кабатларга
Әгәр сүзен бик еш кабатларга Туры килә гомер иткәндә. Шушы сүзгә килеп төртеләбез Гомер йомгакларын сүткәндә. Әгәр белгән булсам йөрмәс идем Син атлаган тайгак сукмактан. Җаным-тәнем биреп сөймәс идем, Качар идем ялкын-учактан. Ярсу күңелем әгәр сизгән булса, Чыкмас идем карлы-буранга. Җиде тапкыр үлчәп, бер кат киссәм, Төшмәс идем тирән упкынга. Акыллырак булган булсам әгәр, Колак салмас идем гайбәткә. Очлы хәнҗәр кебек ул сүзләрне Якын алмас идем йөрәккә. Үткәннәргә әгәр кайта алсам, Атлар идем туры юллардан. Көч һәм үрнәк алып яшәр идем Туганнардан, якын дуслардан. Кайнар ашны өреп кабар идем, Тормас идем бер дә сайланып. Калган гомеремне яшәр идем Бары, Аллам, сиңа сыенып. Гөлзадә Сафина
1 560 просмотров