Бүген Октябрьскийда Башкортстан Республикасы буенча Ватанны саклаучыларның һәлак булган...
Бүген Октябрьскийда Башкортстан Республикасы буенча Ватанны саклаучыларның һәлак булган гаиләләре Бөтенрусия иҗтимагый оешмасының төбәк бүлекчәсе рәисе Алина Серафимова булып китте. Кунак шәһәр хакимияте вәкилләре озатуында Җиңү паркына килде һәм хәрби бурычларын үтәгәндә һәлак булган хәрбиләр мемориалына шулай ук Солдат уйлары һәйкәленә тере чәчәкләр салды. Ачык һавада оештырылган хәрби техника музее һәм РФ Кораллы Көчләр составындагы гаскәрләр хөрмәтенә куелган һәйкәлләр Алина Олеговнада зур хөрмәт хисе уятса, Яшьармияче йорты тормышы аңарда искиткеч соклану, Октябрьскийда яшь буынны ватанпәрвәрлек рухында тәрбияләү горурлык хисләре уятты. БР буенча Ватанны саклаучыларның һәлак булган гаиләләре Бөтенрусия иҗтимагый оешмасының төбәк бүлекчәсе рәисе Алина Серафимова СВОда катнашучыларга һәм аларның гаилә әгъзаларына ярдәм итү үзәгендә яу кырыннан әйләнеп кайтмаган солдатларның якыннары белән күреште. Очрашуда хакимият башлыгы Алексей Пальчинский да катнашты. Түгәрәк өстәл артына җыелган халык бергәләп кораллы низагта һәлак булган якташларыбызның исемен һәм батырлыгын мәңгеләштерү юнәлешендә күрелә торган чаралар һәм киләчәккә планнар турында сөйләште. Җитәкчеләр баласын югалткан аналарны, тол калган хатыннарны тыңладылар. Ахырда шәһәр тормышында актив катнашучы октябрьскийлылар бүләкләнде. Лаеклы ул тәрбияләп үстергән өчен Гүзәл Вәлиева «Ватанны саклаучының анасы» медале белән хөрмәтләнде.