🔹 Россияның Чырыдыышкын яамызының, Россияның уруглар төвүнүң, Баштайгылар шимчээшкинин... — 15 июня 2026 г. в 08:16:36.811
🔹 Россияның Чырыдыышкын яамызының, Россияның уруглар төвүнүң, Баштайгылар шимчээшкининиң деткимчези-биле Россияның «Билиг» ниитилелиниң боттандырып турары «Билиг.Дагдыныкчылар» төлевилелинде Россияның бүгү регионнарындан 7 муң ажыг киржикчи киржип турар. Тыва Республикадан 29 дагдыныкчы билдириишкинни киирген. 2026 чылдың июнь 30-ге чедир төлевилелдиң албан езузунуң сайтызында билдириишкиннерни хүлээр. «Билиг.Дагдыныкчылар» төлевилелге киржир дугайында билдириишкиннерниң хөй кезии школа төлээлеринден кирген болза, ортумак профессионал өөредилге черлеринден дагдыныкчыларның билдириишкиннери 30 хире хуу болган. Дагдыныкчы башкылар эң идепкейжи болуп, 3564 билдириишкинни киирген. Чөвүлекчи дагдыныкчылар 2082, а удуртукчу дагдыныкчылар 1755 билдириишкинни берген. «501 кижиден хөй өөреникчилерлиг школаның эң эки дагныкчызы» номинация эң нептереңгей. Амгы үеде төлевилелдиң киржикчилери «Билиг.Академия» шөлде өөредилгени эртип турар. Оларга «Дагдыныкчының арга-дуржулгазы: тура-соруу кошкак аныяктарның бот-бүзүрелин сайзырадыры» деп тускай курсту ажылдап кылган. Дыңнакчылар арга-шинээн үнелээр амгы үениң аргаларын, бүзүрелдиг харылзааларны канчаар тургузарын, аныяктарның бот-тускайлаң сайзыралын канчаар деткиирин шиңгээдир. Курс дагдыныкчы чорук практиказын, сорук киирер аргаларны болгаш профессионал “өжүүшкүннү” болдурбас аргаларны таныштырар. Специалистер өөредилгезин доозупкаш, боттарының дагныкчы ажыл-чорудулгазының үре-түңнелдерин көргүскен профессионал портфолиону чыып, башкылаашкын ажылынга даянган, практиктиг даалгаларны күүседип, боттарының дагдыныкчы практиказын таныштырар. Эксперттерниң демдээнге даянып, бүгү чурттуң аңгы-аңгы регионнарындан тулган дагдыныкчыларны шилиир. Тиилекчилерге акша шаңналдарын тыпсыр болза, а эки түңнелдерлиг 200 киржикчини «Машук» билиглер төвүнге өөредилге программазынче чалаар. Аңаа олар боттарының практиказын таныштырып, коллегалары-биле арга-дуржулгазын солчуп, профессионал өзүлдезин уламчылаар. «Билиг.Дагдыныкчылар» төлевилелче билдириишкиннерни июнь 30-ге чедир киирип болур. Өөредилге черлериниң удуртукчулары болгаш оларның оралакчылары, башкылар, директорларның уруглар каттыжыышкыннарынга кижизидилге болгаш кады ажылдажылга талазы-биле чөвүлекчилери билдириишкиннерни киирип болур. Билиг.Дагдыныкчылар төлевилел ниити өөредилге черлеринде болгаш ортумак профессионал өөредилге системазында даганыкчыларны илередип, деткип база профессионал сайзыралынга комплекстиг системаны ажылдап кылыр. Дагдыныкчыларның ат-алдарын бедидеринге, чырыдыышкын ажыл-чорудулгазын сайзыраңгайжыдарынче болгаш өөредилгениң чедимчелиг аргаларын нептередиринче онза кичээнгейни угландырган.