🔹 Тываның Чазаа шериг чевег-тураскаалдарны кадагалап камгалаары-биле муниципалдыг тург... — 18 июня 2026 г. в 10:05:51.191
🔹 Тываның Чазаа шериг чевег-тураскаалдарны кадагалап камгалаары-биле муниципалдыг тургузугларга регионалдыг бюджеттен субсидиялар бээриниң чурумун бадылаан. Ол сорулгага көрдүнген бюджет акша-хөреңгизиниң хуваакчызы ТР-ниң Культура яамызы таварыштыр дузаны үлээр. Республиканың культура сайыды Виктор Чигжиттиң тайылбырлааны болза, муниципалдыг тургузуглар кады акшаландырыышкыны-биле чарыгдалдарның чамдыызынга, ол ышкаш конкурстуг шилилге түңнелинге даянгаш, акша-хөреңгини шилчидер. Дилеп-тывар ажылдар үезинде тывылган дайынчылар сөөгүн орнукшуткан черлерни чаагайжыдарынга, шериг чевеглерни катап тургузарынга, тураскаал демдектерни салырынга, Ада-чуртун камгалап тургаш мөчээн дайынчыларның аттарын тураскаал самбыраларже киир бижииринге ол субсидияларны ажыглаар. Күрүне бүрүткелинде шериг чевеглер бар муниципалдыг тургузуглар ол дузаны алырынче кордап болур. Шериг чевег-тураскаалдарны чаагайжыдар, катап тургузар программаны ажылдап кылгаш, субсидия үлээр шилилдеге киржир. 2026 чылда республиканың каттышкан бюджединде 676,8 муң рубль субсидия акшазы шериг чевеглерни катап тургузар база септээр ажылдарга көрдүнгенин сайыт дыңнаткан. Тиилелгениң 80 чыл оюнда республика Баштыңының инициативазы-биле мемориалдыг комплекстерни санап-ончалаанының түңнелинде, Тываның девискээринде амгы үеде 97 шериг тураскаалдары бар болган. Бо чылын оларның кайызын эде чаартыры чогуур муниципалдыг программаларны шилээн соонда билдинер.