🔹 2026 чылдың эгезинден бээр бүүрек аарыглыг 74 аарыг кижиге гемодиализ салдырар черже... — 21 июля 2026 г. в 03:39:28.050
🔹 2026 чылдың эгезинден бээр бүүрек аарыглыг 74 аарыг кижиге гемодиализ салдырар черже аай-дедир орук өртээ дээш 2,7 млн рубльге эгидип берген. Тываның Баштыңы Владислав Ховалыгның даалгазы-биле, доктаамал гемодиализ херек район чурттакчыларынга аай-дедир орук чарыгдалдарының компенсациязын бээр арга Тывага 2026 чылдың январь 1-ден тургустунган. Владислав Ховалыг республиканың аар аарыгга таварышкан чурттакчыларынга деткимчениң чугула хемчеглериниң дугайында МАХ-та бодунуң каналынга дыңнадып, найысылалдан чеже-даа ыракта чурттап турар болза, республиканың чурттакчы бүрүзүнге эмчи дузазын чедингир болдурары – эрге-чагырганың сорулгазы деп харыылаан. Республиканың Баштыңы билдириишкиннерни киирериниң тодаргай чурумун болгаш чарыгдалдарны эгидер таарымчалыг аргаларны ажылдап кылырын Кадык камгалал яамызынга дааскан. Аарыг кижи гемодиализ процедуразын эртер черинче орук чарыгдалдарын эгидип бээр дугайында билдириишкинни эмнээшкин эрттирип турары эмнелге организациязынга киирип болур деп, Кадык камгалал яамызы тайылбырлаан. Билдириишкинге бодун шынзыткан документизиниң хоолгаларын, банк агар санының реквизиттерин база гемодиализ санының база хүнүнүң дугайында справканы кожар ужурлуг. Аарыг кижиниң бүүрек эмнээшкинин амбулаторлуг чорудуп турар эмнелге организациязы процедураны алган хүнүнүң болгаш санының дугайында справканы бээр. Кызылда ийи ындыг организация бар – республиканың №1 эмнелгезиниң нефрология салбыры база «Нефросовет» хуу эмнелге албан чери. Комиссия билдириишкиннерни ай санында эвээш дизе чаңгыс катап сайгарар. Пассажирлерни автотранспорт-биле аргыштырганының тарифтеринден болгаш календарьлыг айда алган процедураларның санындан дедир эгидер чарыгдалдарның түңү хамааржыр деп ведомство тодаргайлаан.