🔹 Тывада 81 муң ажыг пенсия алыкчылары чурттап турар. Россияның Социал фондузунуң Тыва... — 20 июля 2026 г. в 08:27:30.968
🔹 Тывада 81 муң ажыг пенсия алыкчылары чурттап турар. Россияның Социал фондузунуң Тыва Республикада салбыры ай санында пенсия төлевирлеринче 2,2 млрд ажыг рубльди үндүрүп турар. Пенсионерлерниң 67 муңу, азы 83 хуузу пенсиязын банк агар санындан уштуп ап турар болза, а арткан 14 муңу, азы 17 хуузу, почта салбырларындан алырлар. Регионалдыг социал фонд амгы технологиялар-биле пенсияларны билдириишкин чокка долдуруп турар. 2026 чылда салбырның эксперттери инвалид болганы болгаш азырадыкчызын чидиргени дээш, 1,5 муң камгаладылга болгаш социал пенсияларны билдириишкин чокка кылган. 1956 чылдың июль 14-те ССРЭ-ниң шупту чурттакчыларынга пенсия алыр эргезин ажыглаарын чөпшээрээн «Күрүне пенсияларының дугайында» хоойлу хүлээп алдынган. Шак ол хоойлу амгы үениң пенсия эргезиниң үндезинин салган, назы-хар болгаш күш-ажыл стажынга негелделерни, ол ышкаш пенсия тыпсырынга өске-даа хемчээлдерни доктааткан. Тыва Республиканы Ыраккы Соңгу чүк болгаш аңаа деңнештирген черлер району кылдыр санаанындан, регионнуң чурттакчылары ниити тургускан пенсия назы-харындан беш чыл бурунгаар эрте пенсияже үнер эргелиг. Эртежик пенсияже үнер соңгу чүктүң ажыл стажы Ыраккы Чөөн чүк регионнарынга 15 чыл азы аңаа деңнештирген черлерге 20 чыл болур. Оон ыңай, камгаладылга стажы херээжен улуска 20 чылдан эвээш эвес, а эр улуска 25 чылдан эвээш эвес, ол ышкаш 30-ден эвээш эвес пенсия коэффициентилиг болур ужурлуг. Тывада ийи ажы-төлдүг херээжен чоннуң хөй кезии 50 харлыында пенсияже үнүп турар. Үе-шаанда чоруттунган ажыл аңаа улуг рольдуг – пенсия томуйлаарынга баш бурунгаар хемчеглер төлевирлерни долу хемчээлинге, эвээш документилер азы кандыг-даа билдириишкин чокка санаарынга херек медээлерни хынап, тодарадыр арганы берип турар. Бо чылын Тываның социал фондузунуң ажылдакчылары 5037 чурттакчының төлевиринге хамаарыштыр шалыпкын ажылдаан. Баш бурунгаар ажылдап, сан-чурагайжыдылганы ажыглаанындан, пенсия тыпсырының үези база кызырылган. Россияның Социл фондузунуң салбыры төлевирлерниң хөй кезиин беш ажыл хүнүнүң дургузунда томуйлап турар, ол дээрге хоойлуда көрдүнген хуусаадан ийи катап дүрген. РСФ-тиң Тывада салбыры 80 хар чеде берген пенсия алыкчыларның төлевирин билдириишкин чокка немей санап турар. 2026 чылда өстүрген төлевирни 105 пенсионер ап эгелээн. Тываның чурттакчылары күрүне ачы-дузаларының порталы, Россияның Социал фондузунуң салбарының клиент албаннары база МФЦ офистеринден хууда агар санының байдалының дугайында ушта бижилгени чагып, пенсия эргелериниң, камгаладылга стажының болгаш чыгдынган дадывырларының дугайында медээлерни билип ап болур. Чурттакчы чон РСФ-тиң Тыва Республикада салбырының специалистеринден пенсия айтырыгларынга хамааржыр консультацияны 8 800 100 0001 телефонче (халас) долгааш, айтырып болур. Регионалдыг шугум понедельниктен четвергке чедир 9:00 шактан 18:00 шакка чедир, а пятницада 9:00 шактан 16:00 шакка чедир ажылдаар.