🔹 Россияның Чазааның Даргазы Михаил Мишустин Тывага аалдап чорааш, РФ-тиң чырыдыышкын ... — 4 августа 2026 г. в 03:12:56.707
🔹 Россияның Чазааның Даргазы Михаил Мишустин Тывага аалдап чорааш, РФ-тиң чырыдыышкын сайыды Сергей Кравцов база Тываның Баштыңы Владислав Ховалыг-биле кады, Кызыл хоорайның 22 дугаар школазынга чедип, школа чанының «Пифагор» чайгы лагериниң ажылы-биле танышкан. 825 олуттуг, Д.Б. Ондар аттыг 22 дугаар ортумак школа «Өөредилге» национал төлевилели-биле Тывада туткан чаа школаларның бирээзи. Бир чыл бурунгаар эжиин ажыткан школа Тываның өөредилге хөгжүлдезинге улуг үлүг-хуузун киирген Тыва АССР-ниң өөредилге сайыды Дожулдей Бурзунеевич Ондарның адын эдилеп чоруур. Ооң яамыны удуртуп чораан чылдарында бүдүн республикага чаа өөредилге черлери туттунуп, малчыннар ажы-төлүнге болгаш өскүс уругларга школа-интернатка чурттаар байдалын экижиткен. Чаа школада инженер-техниктиг болгаш бойдус эртемнеринче онза кичээнгей салдынган. Төлевилелдер дамчыштыр өөредилге болгаш тускай бүдүрүлгелер-биле кады ажылдап, практикаже угланган арганы ажыглап турар. Компьютер класстары, робототехника болгаш 3D модельдер лабораториялары, салым-чаяанныг уругларга сайзырал төвү бар. Төптүң өөреникчилери мөөрейлер, олимпиадаларда киржип, физика эртеминде шылгарап үнүп турар. Михаил Мишустин өөредилге чериниң класстарын болгаш столоваязын эргип, чайгы школа лагеринде уруглар-биле чугаалашкан. Чазак Баштыңы школа библиотеказынга барып, класстан дашкаар номчулгага ажыглаар номнарны белекке берген. Россияның чырыдыышкын сайыды Сергей Кравцов школаларда чаа өөредилге чылынга белеткел ажылдары план езугаар чоруп турарын чазак баштыңынга илеткээн. Ооң чугаазы-биле алырга, бо чылын школаларны физика, хөгжүм, уран чурулга, а келир чылда математика, биология, химия кабинеттери-биле чепсеглээр. Михаил Мишустин сөөлгү ийи чылда чуртта чаңгыс аай күрүне шылгалдазын дужаарда, физиканы кол эртем кылдыр шилип алган уруглар саны 33 хуу, а математиканыы – 25 хуу көвүдээнин демдеглээн. «Бо дээрге эртем угланыышкынныг мергежилдерже, нарын эртемнерже сонуургалдың эглип келгениниң бадыткалы-дыр» - деп, ол чугаалаан. Премьер-министр школаның физика кабинедин көрүп, бо эртемниң дугайында аныяк башкы-биле чугаалашкан. Чаңгыс аай күрүне шылгалдазының Тывада түңнелдеринден алырга, бо чылын республика физика шылгалдазын 100 баллга дужааган бирги доозукчулуг болганы дээш, ол башкыга база бүгү башкылар ниитилелинге четтиргенин илереткен. «Бо демдек башкыларның ажылының түңнелин көргүзүп турар» - деп, ол онзалап айыткан. Премьер-министр каш чыл бурунгаар ол эртем программазынче катап эглип келген күш-ажыл кабинедин база көрген. Күш-ажыл башкызы Буян Саая аалчыны уткуп, өөреникчилериниң кылганы корабльдар, катерлер макеттерин база тыва хөгжүм херексели - дошпулуурну көргүскен. Чазак Баштыңы башкыдан ойнаарын дилээнге, ол хөөмей-сыгыдын бараалгаткан. Михаил Мишустин регионда өөредилге адырында бурунгаар базымнарны демдеглээн. Тывада школалар болгаш уруглар садтарының хөгжүлде программазы-биле эки таныш дээрзин демдеглээш, федералдыг бюджет аргаларын ажыглап, өөредилге черлерин ам-даа тударын болгаш септээрин чагаан. Михаил Мишустин ол чорааш, чаа өөредилге номнарын школага берген. Тываның Баштыңы Владислав Ховалыг МАХ-та бодунуң каналында, амгы үениң инфраструктуразы болгаш эртемже сонуургалдыг уруглар – федералдыг төптүң улуг ажылының болгаш ачы-дузазының түңнели-дир деп демдеглээн. Сөөлгү чылдарда Тывада 11 чаа школа туттунган, 55 школаны эде чаарткан. «Чаңгыс демниг Россия» партия бо талазы-биле регионга идепкейлиг дузалап турар. Республиканың Баштыңы Тываже кичээнгейни салып, бүгү талазы-биле деткип турары дээш, Россияның Чазаанга болгаш Михаил Мишустинниң бодунга четтиргенин илереткен.