Дүпсүннэр, чэриктэйдэр санаалара бөҕөх — 8 июля 2026 г. в 09:17:57.794
Дүпсүннэр, чэриктэйдэр санаалара бөҕөх Бүгүн улуус баһылыга Василий Алексеев Дүпсүн, Чэриктэй нэһилиэктэригэр үлэлээтэ. Баһылыгы кытта тыа хаһаайыстыбатын улуустааҕы управлениетын начаалынньыга Артем Сивцев уонна хапытаалынай тутууга, архитектураҕа управлениетын салайар Максим Гуляев сырыттылар. Оробуочай бөлөх сүрүннээн тыа хаһаайыстыбатын хайысхатынан олохтоохтору кытта көрсөн баар кыһалҕалар тула кэпсэттилэр. Дүпсүн нэһилиэгэр көрсүһүү «Дүпсүн» тыа хаһаайыстыбатын оҥорон таһаарар кооперативыгар буолла. Биллэн турар, олохтоохтор сэлээркэ боппуруоһун урут бастаан туоһуластылар. Онуоха Василий Петрович республикаҕа сэлээркэнэн хаһаайыстыбалаах дьону хааччыйыы соруга бастакынан турбутун, ол курдук күн бүгүҥҥүттэн нэһилиэнньэ төһө сайаапканы түһэрбитинэн сэлээркэни биэриэхтэрин туһунан иһитиннэрдэ. Чэриктэйгэ спорт-култуура дьиэтин тутууну биир бастакынан сурастылар. Ону сэргэ олохтоохтор оттуур арыы сирдэрин өртүүрү көҥүллүүллэригэр, уматык нуорматыгар ыраах олороллорун учуоттуулларыгар көрдөһөллөр. Бу нэһилиэк олохтоохторо арыыга оттуур буоланнар, бу сыллар тухары икки моторка икки ардыгар хаптаһын мастары ууран, баржа оҥостон тиэхиньикэлэрин арыыга таһааралларыгар улахан кыһалҕаны көрсөн кэллилэр. Сыл аайы тиэхиньикэни ууга түһэрии түгэнэ да тахсара. Бу кыһалҕаларын туоратаарай диэн Василий Петрович: «Кэһиилээх кэллим», – диэн, тиэхиньикэ тиэйэргэ аналлаах үс устуука эрэһиинэ катамараны бэлэх туттарбыта олохтоохторго соһуччу үөрүү буолла. Сиһилии Мария Аргунова ⬇️ БАТТАА 📲Мах-каналбытыгар сурут ⬇️ https://max.ru/join/3C9ZQLhT3NOAcTqvoqV7q1JihA40sSL8ZGoFY5jwqMU 🌐мюрюгазета.рф ✅ @uamurusahargata @ulusmedia