Бүгүн, от ыйын 21 күнүгэр Ил Дархан Айсен Николаев Уус Алдан улууһугар үлэлээтэ. — 21 июля 2026 г. в 05:40:33.058
Бүгүн, от ыйын 21 күнүгэр Ил Дархан Айсен Николаев Уус Алдан улууһугар үлэлээтэ. Айсен Сергеевич сырыытын хаарбах дьиэттэн көһөрүү программатынан тутулла турар 58 квартиралаах уопсай дьиэ тутуутун көрүүттэн саҕалаата. 5507 кв.м. уопсай иэннээх, түөрт этээстээх дьиэ тутуутун Арсен Ермолаев салайааччылаах "Дохсун" хааччахтаммыт эппиэтинэстээх тэрилтэ муус устар ыйтан саҕалаабыта. Билиҥҥи туругунан 31 тутааччы, 6 техника үлэлии-хамсыы сылдьаллар. Үлэ хаачыстыбалаахтык, тэтимнээхтик ыытыллан, үлэ былаанын 35% толорон, былааны куоһаран иһэллэрин улуустааҕы хапытаалынай тутуу уонна архитектура управлениятын начальнига Максим Гуляев иһитиннэрдэ. СӨ тутууга миниистирэ Виктор Романов үлэ хаамыыта сөпкө баран иһэрин бэлиэтээтэ, итиэннэ үлэ хаачыстыбалаахтык ыытыллан, ыйыллыбыт болдьоҕор үлэни түмүктүүргэ сорудахтаата. Айсен Сергеевич тутуу үлэтин хаамыытын көрөн-истэн, билсэн баран, салгыы бу тэтими ыһыктыбакка үлэни ыытан, эһиилги дьыл төрдүс кыбаарталыгар дьон үөрэ-көтө көһөн киирэллэригэр баҕа санаатын тиэртэ. Улуус дьаһалтатын пресс-сулууспата.