Бүгүн, дойду үрдүнэн киэҥник бэлиэтэнэр Физическэй култуура күнүгэр, Саха АССР спорт кэ... — 8 августа 2026 г. в 07:01:35.595
Бүгүн, дойду үрдүнэн киэҥник бэлиэтэнэр Физическэй култуура күнүгэр, Саха АССР спорт кэмитиэтин салайааччыта, Саха сиригэр маассабай спорду тэрийээччилэриттэн биирдэстэрэ Николай Тарскай төрөөбүт дойдутугар, Баатаҕай нэһилиэгэр үөрүүлээх күн буолла! Ол курдук, олохтоохтор туруорсубут баҕа санаалара туолан, «Демография» национальнай бырайыак чэрчитинэн, «Спорт – норма жизни» федеральнай бырайыак иһинэн «Бизнес-спорт» («Я выбираю спорт») бырайыагынан ГТО (Готов к труду и обороне) комплекса тутуллан, үөрүүлээх быһыыга-майгыга аһылынна. Бу аныгылыы көрүҥнээх спортивнай комплексы урбаанньыт Захар Стрекаловскай тэрилтэтэ тутан, үлэҕэ киллэрдэ. Комплекс үөрүүлээх аһыллыытыгар аалай лиэнтэтин улуус баһылыгын солбуйааччыта Григорий Аргунов, Баатаҕай нэһилиэгин баһылыга Михаил Белолюбскай, Баатаҕай нэһилиэгин бочуоттаах олохтооҕо, спорт бэтэрээнэ, СӨ физическэй култууратын уонна спордун туйгуна, оҕо спордун бастыҥ көҕүлээччитэ Николай Адамов, Н.Н. Тарскай аатынан Баатаҕай орто оскуолатын физкультура уонна ОБЖ учуутала, остуол оонньуутугар СӨ спордун маастара Ян Готовцев, Баатаҕай орто оскуолатын 4 кылааһын үөрэнээччитэ Артем Белолюбскай быстылар. СӨ спордун миниистирэ Леонид Спиридонов быһа сибээһинэн, улуус депутата Алексей Троев, улуустааҕы футбол федерациятын салайааччыта Василий Макаров кыттыыны ылан, эҕэрдэлэрин тиэртилэр, спортка ситиһиилэри баҕардылар. ГТО площадкатыгар хас биирдии киһи доруобуйатын туругун сыаналанар, күүһүн-уоҕун тургутар кыахтанар. Манна сааһыттан тутулуга суох нэһилиэнньэ барыта оҕо да, улахан да киһи кэлэн дьарыктанар, доруобуйатын бөҕөргөтөр усулуобуйата баар буолла. Бу комплекс Баатаҕай нэһилиэгин олохтоохторугар чэгиэн туруктаах, күүстээх-уохтаах буолалларыгар улахан тирэх буолуоҕа. Комплекс аһыллыытыгар бастакы күрэхтэһиигэ футболистар сүрэхтэннилэр. Манна ыаллыы сытар бөһүөлэктэртэн Кэптэниттэн 4 хамаанда, Уһун Күөлтэн 1 хамаанда уонна олохтоохтор буолан, барыта 6 хамаанданан оҕолор илин-кэлин түһүстүлэр. Улуус дьаһалтатын пресс-сулууспата.