Бүгүн улуус баһылыга Василий Алексеев Саһылыкаан бөһүөлэгэр нэһилиэнньэни кытта көрсөн,... — 24 августа 2026 г. в 10:53:14.049
Бүгүн улуус баһылыга Василий Алексеев Саһылыкаан бөһүөлэгэр нэһилиэнньэни кытта көрсөн, улууска ыытылла турар үлэни-хамнаһы билиһиннэрдэ. Ол курдук инфраструктураны сайыннарыыга, социальнай эбийиэктэри тутууга уонна тыа хаһаайыстыбатын өйөөһүҥҥэ саҥа бырайыактар олоххо киириилэрин сырдатта. Ордук тыа хаһаайыстыбатын эйгэтигэр туох көмө, өйөбүл баарын интэриэһиргээн туоһуластылар, санааларын атастастылар. Олохтоохтор бэйэлэрин кыһалҕаларыгар эмиэ тохтоотулар. Ол курдук бөһүөлэккэ киирии муоста эргэрэн өрөмүөҥҥэ наадыйбытын, суол оҥоһуутун туруорустулар. Бу боппуруоһу улуус дьаһалтата үөрэтэн, эһиилги бүддьүөт былааныгар киллэрэр соругу ылынна. Салгыы баһылык 2019 сылтан үлэлиир «Саһылыкаан» тыа хаһаайыстыбатын потребительскай кооперативын бааһыналарын көрдө. "Саһылыкаан" кооператив бастакы сылларыгар 100 гектартан саҕалаан сир оҥоруутунан дьарыктаммыт хаһаайыстыба билигин биллэрдик кэҥээбит. Быйылгы сылга 50 гектарга сэлиэһинэй, 281 гектарга эбиэс, уопсайа 331 иэннээх сиргэ ыһыы үлэтэ ыытыллыбыт. Кооператив биир тутаах үлэһитэ, Петр Попов, хаһаайыстыба күннээҕи түбүгүн, тиэхиньикэ саҥардыллыытын уонна үүнүү хаамыытын сиһилии билиһиннэрдэ. Бурдук тардар эргэ мельница баарын чөлүгэр түһэриэхтэрин баҕаралларын, ону таһынан бородууксуйаларын переработкалаан, киэҥ эйгэҕэ таһаарар баҕа санаалаахтарын иһитиннэрдэ. Түмүккэ Василий Петрович дойдуларыгар бэриниилээх, туруу үлэһит дьону улуус дьаһалтата өрүү өйүүрүн уонна улууспут сайдарын туһугар бары бииргэ түмсэн үлэлээтэххэ, үлэ үтүө түмүктээх буоларын бэлиэтээн эттэ. Улуус дьаһалтатын пресс-сулууспата.