Кыһыл көмүс ыалга — 28 июля 2026 г. в 11:39:26.678
Кыһыл көмүс ыалга БАТЫҺЫННАРА СЫЛДЬАН ҮЛЭЛЭТТЭХХЭ... Үлэ диэн баран «муннукка ытаабыт» дьоҥҥо – Варвара Захаровна уонна Иннокентий Степанович Стрекаловскайдарга – Суотту сис ыалыгар ыалдьыттаан, эбээлээх-эһээлээхпэр сылдьыбыт курдук сананным. Ытык кырдьаҕастар 50 сыл ыал буолан олорбуттарын номнуо бэлиэтээбиттэр. Улууска былырыын чиэстээбиттэр. Олуһун диэн ыалдьытымсах, элэккэй дьон буолан биэрдилэр Иннокентий Степанович өр сылларга «Лена» сопхуоска агрономунан үлэлээбит. «50-ча сыл буор буккуйдум», – диэн кэпсиир. Ол курдук, төһө да сынньалаҥҥа олорбуттарын үрдүнэн, хортуоска, хаппыыста бөҕөтүн олордоллор. Тахсан илэ харахпытыгар көрдүбүт, үүнүү бэртээхэй! Онноҕор дьэдьэн плантацияламмыттар. Сиэн оҕолор үргээн күннэтэ минньигэс сииллэр, оҕолоро барыанньаҕа, тоҥорорго диэн сотору-сотору хомуйаллар. Инокентий Степанович «адретта» диэн сорттаах хортуосканы урут уруккуттан олордобун диэн кэпсиир. Өссө Иркутскайга үөрэнэ сылдьан, хортуоппуйу чинчийэр профессоры кытта билсэн, ылбыт сиэмэтин элбэтэн билигин да үүннэрэ олорор, олус хайҕыыр: аһын амтана, үүнүүтэ, хараллыыта үчүгэй үһү. Үлэһит Стрекаловскайдар этэр этиилэрэ судургу: туох барыта үчүгэйдээх да, куһаҕаннаах даҕаны. Оҕону элбэх дьон үлэҕэ сыһыарбат, харыстыыр. Кыра эрдэҕиттэн үлэни сыаналыыр, өйдүүр ыччат мунну сынтарыйарын билэн улаатар. Ыарахаттары, күчүмэҕэйдэри ааһыахха, тулуйуохха наада оччоҕо киһи-киһи буолар! Варвара Захаровна этэринэн, оҕонньор урут оҕолорун, билигин сиэннэрин батыһыннара сылдьан үлэлэтэр. Кырдьык, үлэһит киһи ханна да сүтэн-симэлийэн биэрбэт. Оннук, төһө да саастаахтарын үрдүнэн, аҕа Стрекаловскайдар үлэлии-хамсыы сылдьаллар, дьонугар, дэриэбинэ олохтоохторугар, улуустарыгар үтүө холобурдаах ыал. Олоххо көрүүлэрэ, интэриэстэрэ, үлэлэрэ киһини үөрдэр уонна мотивациялыыр «Макс-канал»: подписаться 🟡