🕯️ Ҡайғылы хәбәр алдыҡ. Башҡортостандың халыҡ артисы Зилә Сәйетова вафат. — 13 июня 2026 г. в 14:41:28.282
🕯️ Ҡайғылы хәбәр алдыҡ. Башҡортостандың халыҡ артисы Зилә Сәйетова вафат. Мостай Кәрим исемендәге Милли йәштәр театры актрисаһы, Башҡортостандың халыҡ артисы Зилә Сәйетова арабыҙҙан китте. Уға ни бары 55 йәш ине. Сәйетова Зилә Хәҙи ҡыҙы Башҡортостандың Белорет районы Азыҡай ауылында тыуған. 1991 йылда Өфө дәүләт сәнғәт институтының театр факультетын тамамлай. Хеҙмәт юлын Мәжит Ғафури исемендәге Башҡорт дәүләт академия драма театрында башлай. Башҡортостан Республикаһы Милли йәштәр театрында эшләгән йылдарында Зилә Сәйетова үҙен талантлы актриса итеп танытты. Ул башҡорт, Рәсәй һәм донъя драматургияһы әҫәрҙәре буйынса ҡуйылған спектаклдәрҙә 45-тән ашыу образ ижад итеп, юғары башҡарыу оҫталығы күрһәтте. 2011 йылда театр сәнғәтен үҫтереүгә индергән ҙур өлөшө өсөн уға «Башҡортостан Республикаһының атҡаҙанған артисы» тигән маҡтаулы исем бирелде. 2022 йылда ул «Башҡортостандың халыҡ артисы» исеменә лайыҡ булды. «Юлдаш» радиоһы мәрхүмәнең туғандарының һәм яҡындарының ауыр ҡайғыһын уртаҡлаша.