Ытыктыыр, убаастыыр киһибит, Охонооһой Сэмэнэбис Федоров, 85 саастаах өрөгөйдөөх үбүлү... — 24 мая 2026 г. в 13:55:18.974
Ытыктыыр, убаастыыр киһибит, Охонооһой Сэмэнэбис Федоров, 85 саастаах өрөгөйдөөх үбүлүөйүгэр анаан «Саха» НКИХ «Кэрэ кэпсээн» биэриитигэр олус истиҥ, иһирэх кэпсэтии буолла. Охонооһой Сэмэнэбиһи мин оҕо эрдэхпиттэн билэбин. Аан маҥнай уончалаах бэдик сылдьан «Охоноон» диэн киинэҕэ оонньообутун көрөн турардаахпын. Охоноону олуһун аһынан, дьоллоох киһи буолуон ис сүрэхпиттэн баҕарбыппын өйдүүбүн. Киинэ уһуллубута быйыл номнуо 40 сыл буолбут, ол туһунан Сэмэн Ермолаев олус бэккэ бэлиэтээн эттэ, хайдах уһуллубуттарын кэпсээтэ. Киһи хараастыах киинэ хараллыбакка, күн бүгүн толору кээмэйэ ханна да суох эбит. Кэнники нэһилиэкпэр баһылыктыы сылдьан сууллубут сэргэни хайдах, ханна гынабыт диэн кыһалҕа үүйэ-хаайа туппута. Онно Охонооһой Сэмэнэбиһи кытта аан бастакыбын көрсөммүн туох сиэри-туому оҥорорбутун сүбэлэппитим. Онтон ыла туох эмэ өйдөммөт буоллаҕына, мунаардахпына, ылымматахпына куруутун Охонооһойтон сүбэлэтэбин-амалатабын. Куоракка кэлэн баран биэс сыл курдук сыҥаланаммын Туймаада ыһыаҕар киниэхэ режиссер быһыытынан, көмөлөһөөччүнэн үлэлээбитим. Ол кэмтэн кинилиин ыкса билсибитим элбэххэ үөрэммитим, ыһыах тутулун, ыһыах бөлүһүөпүйэтин билбитим, саха төрүт култууратыгар үгүс саҥа көрүүлэммитим. Кини Ксенофонт Дмитриевич Уткин – Нүһүлгэн этэринии киһи киһитэ - киһилии киһи - киһилээх киһи. Оҕону кытта оҕо, эдэри кытта эдэр, оҕонньору кытта оҕонньор. Хаһан даҕаны үтүөмсүйбэккэ, киһи өйдүүр уонна ылынар гына ханнык суолунан барыахтааххын чопчу быһаарара миэхэ олус чугас уонна биһирэтэр. Аҕа доҕорбун, куруук сүбэ-ама, дурда-хахха буолар киһибин, уһуйааччыбын, Охонооһой Сэмэнэбис Федоровы, өссө төгүл өрөгөйдөөх үбүлүөйүнэн эҕэрдэлээн тураммын күндү сурутааччыларбын ыам ыйын 30 күнүгэр «Кэрэ кэпсээн» биэриигэ кини туһунан көрөргүтүгэр ыҥырабын.