Үтүө күн үүммүтүнэн!
Үтүө күн үүммүтүнэн! Алтынньы 7-с күнэ үүннэ. Бүгүҥҥүттэн саҕалаан ахсынньы 19-с күнүгэр, кыһыҥҥы Ньукуолаҕа диэри, күммүт ат хаамыытынан кылгаан барар, сырдык кылгыыр, хараҥа уһуур, халлаан тымныйар. “Оттон 8-с чыыһылаҕа хаардаатаҕына, сэтинньи 21-с күнүгэр өрүһү аттаах киһи туоруур буолара” диэн урут кырдьаҕастар кэпсииллэрэ. Бүгүн официальнай бырааһынньык буолбатах эрээри, дойдубутугар Хат дьахталлар күннэрэ бэлиэтэнэр. Бу сүрүн суолтата – ийэ буолуохтаах кэрэ аҥаардарбытыгар болҕомто ууруута. “Саха дьахтар таҥаралаах омук” диэн дэлэҕэ этиэхтэрэ дуо? Омук быһыытынан тэнийэн-үөскээн барарбыт кыргыттарбытыттан, далбар хотуттарбытыттан быһаччы тутулуктаах буоллаҕа... Бүгүн өссө дойдубут президенин төрөөбүт күнэ – В.В. Путин 74 сааһын туолла. Оттон биһиги, бар дьон дьокутааттара, үлэбит-хамнаспыт саҕаланна. Алтынньы 21—22 күннэригэр Ил Түмэн ХХ уочараттаах пленарката буолуохтаах. Көрүллэр боппуруос элбэх: Сахабыт сирин социальнай-экономическай сайдыыта, 2028—2029 сс. кыҥаан оҥоһуллар эһиилги бүддьүөппүт, ЖКХ, тыа хаһаайыстыбатын боппуруостара, дьиэ кэргэн, оҕо аймах, культура, үөрэҕирии өйөбүллэрэ, о.д.а. Бүгүн онтон аҕыйах суолга быстах тохтоон ааһыым... Үөрэх. Муниципальнай үөрэх үлэһиттэрэ государственнай тэрилтэ педагогтарын сэргэ араас көмөнү, мэктиэни ылалларын, тэҥ бырааптаах буолалларын туһугар, СӨ “Учуутал туһанан” сокуонугар уларыйыы кириэхтээх. СӨ “Үөрэх туһунан” сокуонугар эмиэ уларыйыы киирэрэ былааннанар. Ол киирдэҕинэ, учууталлары өйүүр миэрэ өссө хаҥыахтаах: кинилэр государственнай уонна муниципальнай музейдарга ыйга биирдэ босхо сылдьар, үлэлэрин боппуруоһунан (ол иһигэр быраап уонна социальнай көмүскэл туһунан) босхо юрист өҥөтүнэн туһанар буолуохтара. Тыа хаһаайыстыбата. СӨ “Т/х сайдыытын туһунан” сокуонугар АПК эйгэтин каадырдарын күүһүрдэр туһунан уларыйыы киириэхтээх. Чөл олох. Ил Түмэҥҥэ Саха сиригэр электроннай табах араас көрүҥүн, ол-бу кальян уонна энэргиэтик бытархай атыытын хааччахтыыр сокуон бырайыага киирэн сытар. Ол сокуон олоххо киирдэҕинэ, дьону, ордук ыччаты, сүһүрдэр дьаат атыыта муҥ саатар 5 сылга – 2027 с. кулун тутарыттан 2032 с. кулун тутарыгар диэри хааччахтаныахтаах. СВО. Ону сэргэ улахан болҕомто биһиги кэммит геройдарыгар – СВО кыттыылаахтарыгар, кинилэр дьиэ кэргэннэригэр – ууруллуохтаах: өйөбүл, көмө миэрэлэрэ, доруобуйаларын кэлимник чөлүгэр түһэрии, үлэнэн хааччыйыы, уйулҕа көмөтө, ыччаты патриоттуу иитии, о.д.а. Доруобуйа. СӨ “Нэһилиэнньэ доруобуйатын харыстааһын” сокуона саҥалыы оҥоһуллуохтаах. Онно хайаан да Сахабыт сирин айылҕата, сирин-уотун уратыта – барыта учуоттаныахтаах, аныгы федеральнай ирдэбилгэ эппиэттиир буолуохтаах. Уопсайынан, ХХ сиэссийэҕэ элбэх боппуруос көрүллээри турар. 60-тан тахса сокуон барыла оҥоһуллан сытар, онтон сороҕо бастакы ааҕыыны номнуо ааспыта. Онон парламент сонунун сыыйа сырдатан иһиэм. Этэҥҥэ буолуҥ!