Уматык кыһалҕата: быһыы-майгы хонтуруолланар, көмө баар — 15 июля 2026 г. в 06:14:02.440
Уматык кыһалҕата: быһыы-майгы хонтуруолланар, көмө баар Кэлиҥҥи күннэргэ Саха сиригэр, эмиэ дойдубут атын регионнарыгар курдук, бензины уонна дизел уматыгы тиэйэн аҕалыыга бэрт тыҥааһыннаах балаһыанньа үөскээн турар. Ол гынан баран, өрөспүүбүлүкэбит салалтата уонна федеральнай киин суһал, олохтоох быһаарыныылары ылынаннар, “кыһалҕа муҥутуур кирбиитин аастыбыт” диэххэ сөп. Онон тыа сиригэр от-мас үлэтэ да, куорат күннээҕи түбүгэ да атахтаныа суоҕа. Баары баарынан эттэххэ, кыһалҕа, чахчы, баар, суох буолбатах. Дойдуга уматык тула үөскээбит быһыы-майгы Саха сирин эмиэ хаарыйда, ол түмүгэр заправкаларга кылгас кэмҥэ лимиит олохтонно. Төрүөтүн бары билэбит – логистика уонна Арассыыйа киин регионнарыгар баар ньиэп собуоттарыттан уматыгы тиэйии-таһыы уустугурда. Ол гынан баран, атын сирдэргэ бэнсиининэн-сэлээркэнэн үспүкүлээннээн эрэр буоллахтарына, биһиэхэ, Саха сиригэр, салалтабыт балаһыанньаны кытаанахтык хонтуруоллуу олорор, улахан аймалҕаны таһаарбата. Ил Дархаммыт Айсен Сергеевич Николаев балаһыанньаны хара саҕаланыаҕыттан бэйэтинэн хонтуруоллуу олорор. Саамай сүрүнэ ол барыта тылынан эрэ буолбакка, дьыаланан эмиэ дакаастанар. Биир бастакынан Петр Шамаев туруорсан Ил Дархан быһаччы дьаһалынан аграрийдары уматыгынан хааччыйар тиһик олохтоммута. Билигин тыа хаһаайыстыбатын оҥорон таһаарааччылара, отчуттар уматыгынан хааччылла олороллор, бэнсиини-сэлээркэни канистраҕа, буочукаҕа эмиэ кутталлар. Улуустар баһылыктара тургэнник информация ыытар буолуохтаахтар, оччоҕо аграрийдар толору хааччыллыахтара. Сүөһүбүтүн-сылгыбытын кыстыгы туоратар үлэ-хамнас тохтуо суохтаах. Биллэн турар, сапыраапкаларга киирбит хааччах (массыынаҕа 20-30 лиитэрэ) кэккэ кыһалҕаны үөскэтэр. Ол эрээри, ити барыта аймалҕаны таһаарбат, кими да матарбат туһугар оҥоһуллубут сиэрдээх миэрэ. Уматык саҥа баартыйата тиэллэн кэллэр эрэ, лимиит тохтуоҕа. Онон саха ыксаллаах-былдьаһыктаах кэмнэргэ киэҥ көҕүстэнэр, холкутуйуох, ыгылыйымыах, түмсүүлээх буолуох.