Үөрэхпит Казаҥҥа Г.Камал аатын Татаар судаарыстыбаннай академическай театрыгар ыытылла...
Үөрэхпит Казаҥҥа Г.Камал аатын Татаар судаарыстыбаннай академическай театрыгар ыытыллар. Киһи хараҕар олох ыраахтан быраҕыллар, омук төрүт үгэһин-култууратын сэргэ аныгы инновационнай технологияны уонна сир-дойду быһыытын-таһаатын дьүөрэлээн оҥоһуллубут баараҕай тутуу. Иһигэр киирбит киһи, чахчы, сөҕүөн сөҕөр. Килэйэн-халайан, дьэндэйэн, дьэ, сүрдээх тутуу. Барыта 60 тыһ. кв. м иэннээх, 1300 киһини тэҥинэн батарар, олох ураты акустикалаах 4 көрөөччү саалалаах. Камал театра эмиэ биһиги Сахабыт театрын курдук, 1906 с. силис-мутук тардар. Оттон бу саҥардыллыбыт дьиэтэ былырыын эрэ тутуллан үлэҕэ киирбит. Сыаната, быһа холоон, 30 млрд солк. буолбут. Дьиэтин-уотун оҥороллоругар Аан Дойду үрдүнэн конкурс биллэрбиттэригэр, дьоппуон хампаанньата кыайан, бырайыагын-архитектуратын аан дойдуга биллэр Кэнго Кума архитектор оҥорбут. Татаардар бэйэлэрэ эмиэ үлэлэспиттэр. Онон театр омук уратытын да көрдөрөр, аныгыны да тупса5айдык дьүөрэлиир. Дьокуускайбытыгар тутулла турар бэйэбит Арктикатааҕы эпос уонна искусство киинин саныыбын. Бу тутуу концессия быһыытынан 40 млрд быһа холуйан тэңнэһэр, өрөспүүбүлүкэ бюджета тутууга 30%, онтон атына тастан. Дьон санаата араас: ким эрэ “бу кризис саҕана туохха нааданый, көҥдөй ороскуот эрэ” диир, ким эрэ “омукпут культуратын кэрэһэлиир киин хайаан да тутуллуохтаах, харчыны кэрэйиэ суохтаахпыт” диэн өйүүр. Дьиҥэр, Эпос киинин букатын утарааччы суоҕун тэҥэ. Билигин утарааччылар “олох тутуллубатын” диэбэттэр, кинилэр уустук кэмҥэ үп-харчы кэмчилэниэхтээх дииллэр. Ону бары да өйдүүбүт. Оттон мин санаабар, омук төрүт үгэһин, тылын, сиэрин-туомун, культуратын-итэҕэлин боппуруоһа – кыһараҕаннаах да, үтүө да кэм үүннүн – уталыппакка быһаарыллыахтаах тыын суолталаах биир сүрүн сорук. Ити тулхадыйбат өйдөбүллэр – омук омук буоларын, сарсыҥҥы кэскилин тыыннаах кэрэһиттэрэ. Олоҥхобутугар, саха саха буоларын мэктиэлиир тутаах суолларбыт түмүллэн сылдьаллар. Биир күн ол суох буолла, кэми куоттардыҥ да – күммүт киирбитинэн, кэскилбит кэхтибитинэн барар кутталлаах. Ол кырдьык! Урут биир көлүөнэ сүүрбэччэ сылы хабар буолла5ына, билигин уонча сыл иһигэр, олох атын-атын өйдөбүллээх ыччат дьон үүнэр. Олохпут оннук балысханнык сайынна, түргэтээтэ, тэтимирдэ. Маннык кэмңэ, биһиэхэ а5а көлүөнэ дьоңңо, чэпчэкитэ суох сорук турар - ыччаппытын куйаар ситимин кытары күрэстэһэн (онтон ордон),театр искусство нөңүө үйэлээх өйдөбүллэрбитин иңэрии! Хаһан да кэрэ эйгэтин киинигэр сылдьыбатах көлүөнэни ииттэхпитинэ, ол кэхтии кэрэһитэ буолуо5а! Оттон аныгы эйгэни тэрийдэхпитинэ, ыччат бэйэтэ тардыһан, сэңээрэн, кэрэхсээн барыа5а. Бу баара5ай тутуу саңа тыыны киллэрэн олох бары эйгэтин сайдыытыгар суолтата сө5үмэр буолуо5а! Онон хайдахтаах да уустук кэм кэллэр, Камал тыйаатырын курдук оҕону-ыччаты түмэ тардыахтаах, норуот үгэһин көлүөнэлэргэ тиэрдиэхтээх, аныгы олох тэтимин кытары тэңңэ хардыылыыр кииннэр дойдубут бары регионнарыгар хайаан да баар буолуохтаахтар. Ол иһигэр биһиэхэ, Саха сиригэр, Арктикатааҕы эпос уонна искусство киинэ! Олох тутула уларыйда, сайдыы балысханнык барар, кэми кытта тэңңэ хаамсарга, аахсарга бэлэм буолуохтаахпыт. Үлэбит ис хоһоонун кэм ирдэбилиттэн са5ан көрүөхтээхпит, көдьүүстээ5ин өйүөхтээхпит. Бу киин үлэтэ инникитин бюджеттан туспа тосхол көрүллэн, Сахабыт сирин сайдар хорук тымырын курдук тутуллан көрүллүөхтээх!