Татарстан Казань куоратыгар Культура эйгэтигэр салайыы үрдүкү оскуолатын үөрэҕин 5-с тү...
Татарстан Казань куоратыгар Культура эйгэтигэр салайыы үрдүкү оскуолатын үөрэҕин 5-с түһүмэ5э түмүктэннэ. Үөрэхпит алтынньы 27 күнүттэн сэтинньи 1 күнүгэр диэри Галиасгар Камал аат. Татаар судаарыстыбаннай академическай театрыгар буолла. Сарсыарда 8-9 чаастан саҕалаан сорох күн букатын киэһэ 10-11 чааска диэри үөрэннибит, туһугар сылаалаах со5ус) Сүрүннээн, Арассыыйа культурнай уонна цифровой суверенитетын тула буолла, бэйэбит бырайыактарбытынан эмиэ үлэлэстибит. Үөрэхпит туһунан, сымнатан эттэххэ, тута сырдатар, хаартыска таһаарар биһирэммэт… Татарстан раиһа (баһылыга) Рустам Миннихановтыын көрсүһүү буолбута. Киирэн олороотун кытта, тута: “Төрүт культураҕатын хайдах харыстаан олороҕут?”, – диэн ыйыттылар. Онуоха Рустам Нургалиевич: “Бараҥҥыт Саха сирин көрүҥ. Саха сирэ бэйэтин норуотун культуратын хайдах өрө тутан уонна харыстаан олороруттан киһи элбэххэ үөрэниэн сөп” – диэн хоруйдаата. Мин ону истэн баран, норуотум, дойдум, өрөспүүбүлүкэм туһугар илэ-чахчы киэн тутуннум, астынным. Биһиги өрөспүүбүлүкэбит салалтата, бар дьоно, уопсастыбаннаһа культурабытын харыстааһыҥҥа үгүс үлэни ыытарбыт биир туоһута. Аан Дойду таһымыгар ытыктанар салайааччы эппитэ – омукпут туһугар киэн туттууну үс бүк үрдэтэр. Ити – улахан ситиһии уонна сыанабыл. Казаньтан 40 км тэйиччи турар, Иннополиска сырыттыбыт. Бу куорат 2012 с. син биир Сколково уонна Кольцово курдук, Татарстан IT-индустриятын уонна инновациятын киинин быһыытынан тутуллубут. Устудьуоннары, айтишниктары уонна кинилэр дьиэ кэргэннэрин холбоон, барыта 8 тыһ. кэриҥэ киһи олорор. Куорат сүрүн тэрилтэтэ – “Иннополис” университет. Бу Арассыыйаҕа олус элбэх араас чинчийэр лабараториялардаах биир саамай биллэр, улахан үөрэх кыһата буолар. Ураты экономическай түөлбэ буолан, сүүһүнэн араас IT-хампаанньа уонна технопарка үлэлиир эбит. Иннополис мэрэ Ильдар Хуззятов аныгы технология регион сайдыытын сүрүн тирэҕэ буоларын туһунан кэпсээтэ, дискуссия тэрийдэ. Ону таһынан, резиденнэр үлэлэрин, стартаптарын туһунан сырдаттылар. Биир интэриэһинэйэ, “Информатика” хампаанньа бэрэстэбиитэллэрэ культура аныгы тэрилтэлэригэр процесстары автоматизациялыыр тиһиктэр тустарынан кэпсээтилэр. Оттон университет аспирана, “Когникс” стартап төрүттээччитэ Ярослав Юдинских культура эйгэтигэр Оҥоһуу өй технологияны киһиэхэ барытыгар тиийимтиэ оҥорон туһунан бырайыагын билиһиннэрдэ. Кини этэринэн, “Шкатулка” диэн платформа көмөтүнэн программированиены билбэт да киһи идиэйэттэн бэлэм цифровой продукт оҥорон таһаарар кыахтаах эбит. Культура да эйгэтигэр инновация, аныгы технология хото киирэн туттуллар кыахтааҕын көрдүбүт-иһиттибит. Уопсайынан, киһи элбэх саҥаны, сонуну билэр, бэл, олоҕу көрүүтүн кэккэ өрүттэрин уларытар түһүмэх буолла. Этэргэ дылы, ону барытын сыта-тура сыаналаан, “буһаран”, үлэбэр-хамнаспар туһанарым саарба5а суох! Татарстан бэйэтин төрүт үгэһигэр тирэ5ирэн, оло5у кытары тэңңэ сайдан иһэрэ киһини сөхтөрөр. Аныгы өйдөөх-санаалаах салайааччылар олох бары эйгэтигэр балысхан сайдыыны киллэрбиттэрэ илэ биллэр! https://max.ru/id1435030316_gos