ФЫЦЦАГ ЖУРНАЛКӔСӔГ! — 29 июля 2026 г. в 07:17:36.863
ФЫЦЦАГ ЖУРНАЛКӔСӔГ! Журналы алы номыры рацыды хӕдфӕстӕ фысджытӕй редакцийы уазӕг арӕхдӕр вӕййы ГАБОЛАТЫ Зауырбег! Уӕвгӕ, уазӕг нӕу, фӕлӕ журналы ӕмзиууон, автор, хӕлар! Ныр дӕр ацы хӕрзаив номыр фыццаг йӕ къухмӕ чи райста, уый у Габолайы-фырт! Куыд ӕхсызгон вӕййы, куыд! Куыддӕр типографийы кусджытӕ сӕ уӕрдоныл редакцимӕ журналы тираж бур гӕххӕтты тыхтӕй ӕрбаласынц, афтӕ сӕ сӕ сӕрмагонд уатмӕ фӕмидӕг кӕнӕм ӕмӕ дзы къухтӕм фыццаг цы тыхтон бахауы, уый фегом кӕнӕм. Уырдыгӕй, раст цыма, рагӕй дӕр нӕ уындмӕ бӕллыдысты, уыйау сӕ сӕртӕ радыгай сдарынц журналтӕ, рӕвдздӕр нӕ уӕ къухтӕм райсут, зӕгъгӕ. Раст сывӕллон авдӕнӕй йӕ мадмӕ йӕ къухтӕ куыд иваза, афтӕ. Фындзыл абады ноггуырд журналы тӕф ӕмӕ зӕрдӕйы арфы райхъал вӕййынц ӕнкъарӕнты абухгӕ зӕйтӕ! Уӕвгӕ, ирон журналы дӕр уд ис! Ирон лӕджы уд!