💥Ачамның мерген угаадыглары
💥Ачамның мерген угаадыглары 📢Чаа-Хөл кожууннуң Ак-Туруг сумузунда М.К. Өлчей-оол аттыг чаарттынган ном саңынга чогаалчы, шүлүкчү, башкы, Тываның Чогаалчылар эвилелиниң кежигүнү Галина Бүрбүчүктүң "Ачамның мерген угаадыглары" деп номунуң байырлалы болуп эрткен. Ак-Туруг сумузунуң чагырга даргазы Айдың-оол Монгуш аалчыларга болгаш номнуң авторунга чылыг-чымчак сөстерлиг байырын чедирген. Тываның Чогаалчылар эвилелиниң удуртукчузу, чогаалчы, шүлүкчү, очулдурукчу, филология эртемнериниң кандидады Сайлыкмаа Салчаковна Комбу кады келген чогаалчыларны ак-туругжуларга таныштыргаш, ук ном саңынга ном белектерин тывыскан. "Уйгу чок Улуг-Хем", "Чаа-Хөлдүң үнү", "Бора-Булак сырыны" чечен чогаал каттыжыышкыннарының төлээлери чогаалчылар байыр чедириишкиннеринге каттышпышаан, боттарының чогааткан шүлүктерин аянныг номчуп, ыры болган шүлүктерин ырлажып, боттарының номнарын Чаа-Хөл кожууннуң ном саңнарынга сөңнеп, чогаалчы эжи Галина Май-ооловнага суй белектерин тывысканнар. Ол ышкаш чогаалчының чаңгыс- классчылары, кады ажылдап чораан эш-өөрү, төрелдери байыр чедирбишаан, солун сактыышкыннарын чугаалааннар. Байыр чедириишкиннериниң соонда чаа үнген номдан шүлүктерни киржикчилер аянныг күүсеткеннер. Галина Май-ооловнаның оглу, шүлүкчү Альберт Бүрбүчүктүң бижээни "Тыва оюннарга кожамыктар" деп шүлүүн Ак-Туруг ортумак школазының 2-ги клазының өөреникчилери Айслав Анай-оол, Доржана Куулар, Юбиляна Суктор кончуг аянныг болгаш чаптанчыг кылдыр күүсеткеннер. Ол ышкаш 11-ги класстың өөреникчизи Лилия Байыр "Төрээн черим", 6-гы классчы Аманда Монгуш "Малчын акымга", Чаяан Чүлдүм «Ак-Туруг даг», аныяк чогаалчы Артур Сотпа "Тыва кижи", Ак-Туруг сумузунуң хоочун башкызы Валентина Опуйлаа "Авам чылыы" деп авторнуң шүлүктерин аянныг номчуп күүсеткеннер. Чогаалчы, шүлүкчү Галина Бүрбүчүк ном байырлалынга бүгү-ле келген аалчыларынга өөрүп четтиргенин илереткеш, Чаа-Хөл кожууннуң ном саңнарынга болгаш келген аалчыларынга чаа үнген номун белекке берген. Ном байырлалы аалчыларның ниити чурук тырттырылгазы болгаш шайлаашкын-биле доозулган. "Ачамның мерген угаадыглары" деп номнуң байырлалы ниитизи-биле кончуг солун болгаш бедик деңнелге болуп эрткен. Ол байырлал Ак-Туруг сумузунга чечен чогаалдың уттундурбас, чогаадыкчы төөгүлүг болуушкуну болуп артар. / Чодураа АНАЙ-ООЛ, Ак-Туругнуң Монгуш Өлчей-оол аттыг чаарттынган ном саңының эргелекчизи. Чуруктарны авторнуң архивинден алган. “Шын” №14 2026 чылдың апрель 16