💥Муниципалдыг чагыргалар хөй улус баар черлерге саргылардан сезоннуг камгалалды хандыр...
💥Муниципалдыг чагыргалар хөй улус баар черлерге саргылардан сезоннуг камгалалды хандырар ужурлуг 📢Тывада саргыга ызырткаш эмнелгелерден дуза дилеп келген кижилер саны көвүдээн. Республика Баштыңының Аппарат хуралынга Росхереглелхайгааралдың регионалдыг эргелелиниң берген медээзи-биле алырга, Барыын-Хемчик кожуунга бичии уруг саргыга ызырткан бирги таварылга март 25-те бүрүткеттинген. Апрель 13-түң хүнү-биле алырга, сөөлгү үш чылдың ортумак деңнелинден ол 3 катап хөй, азы саргыга ызырткан кижилер саны сес четкен. Тываның Баштыңы Владислав Ховалыг республиканың Кадык камгалал яамызынга база тус чер бот-чагырга органнарынга саргы халдавырынга удур профилактика хемчеглеринге хамаарыштыр хайгаарал органнарының берген сагындырыгларын деткээн. Чижээ, энцефалитке удур уруглар тарыыр план 67,8 хуу, а улуг улуска чүгле 21,7 хуу күүсеттинген. Саргы дамчыштыр тараар халдавырдан аарый берип болур айыылдыг бөлүкте кижилерниң – малчыннар, фермерлер, геологтар, тудугжулар, арга-арыг болгаш бойдус камгалал ажылдакчылары дээш оон-даа өскелерниң 40 четпес хуузу тарыышкынны алган. А вакциналар четчир. Муниципалдыг эрге-чагыргаларның чамдыызы боттарының девискээрлерин саргыга удур хораннап арыглаар хемчеглерни чорутпастааны илереттинген. Кезек муниципалитеттер 2026 чылда чүгле уругларның чайгы дыштанылга лагерьлеринге хоранны чаштырарын планнаан. Ынчап кээрге, чүгле ол черлерни эвес, а парктар, сесерликтер, чевег хөөрлер болгаш өске-даа хөй кижилер чыглыр черлерге, ол ышкаш ооң 50 метр радиус иштинде участоктарынга химиктиг бүдүмелдерни албан чаштырар ужурлуг. Владислав Ховалыг айыылдыг бөлүкте улуг улусту май 15-ке чедир саргы энцефалидинге удур 100 хуу тарыыр даалганы Кадык камгалал яамызынга берген. Кожуун болгаш хоорай чагыргалары парктар, сесерликтер, чевег хөөрлер, школалар, уруглар садтары, стадионнар, дыштанылга баазаларының девискээрлери дээш хөй улус чыглыр шупту черлерге профессионал хораннар чаштырар керээлерни Росхереглелхайгааралче апрель 20-ге чедир киирерин дааскан. «Чурттакчы чонну саргыдан камгалаар чугула хемчеглерниң шуптузун боттандырары – бистиң хамаатыларывыстың, ылаңгыя бичии уругларның кадыкшылының айтырыы болур. Ону кичээнгейге алырын дилээр-дир мен» - деп, республика Баштыңы демдеглээн. Шинчилелдерден алгаш көөрге, Тыва саргы энцефалидинден аарыыр чорук хөй регион кылдыр санаттынар болгаш российжи ортумак көргүзүгден ол элээн хөй. Саргы энцефалиди төп нерв системазынга дээп, чамдыкта неврологтуг аарыгларга болгаш өлүмге безин чедирип болур айыылдыг халдавыр дээрзин сагындыраал. ТР-ниң Чазааның парлалга албаны. rtyva.ru/press/tuva...