💥Далайга дамды дуза
💥Далайга дамды дуза 🎥Буян Владимирович Оюн – Тывада сураглыг кижилерниң бирээзи. Тыва телевидениениң хоочуну, «Тува24» телеканалдың салым-чаяанныг, тулган оператору Буян Оюн кайгамчык кадрларны тырттырып, сагыш-сеткилге артып калыр чырык овур-хевирлерни тургузуп, көрүкчүлерниң сеткилин өөртүп чоруур. Кижилерге өөрүшкүнү сөңнеп чоруур ховар талантылыг коллегавыс Буян Владимирович бо хүннерде берге аарыг-биле маадырлыг демисежип, холу салдынмайн, быжыг тура-сорукту көргүзүп чоруур. Амгы үеде эмнээшкинниң бирги чадазы болур химиятерапияны эртип турар. Ол эмнээшкин чүгле «багай» лейкоциттерни эвес, а «экилерин» база узуткап кааптар болганы-биле, хүннүң-не хан кудары негеттинип турар. Дараазында ийи дугаар чадазында Москва хоорайда шыырак гематология төвүнге эмнээшкинни уламчылаар. Ынчангаш коллегаларының болгаш өске-даа эриг баарлыг, буянныг кижилерниң чылыг-чымчак сөстери, чалбарыг-йөрээлдери, материалдыг дузазы артык эвес деп санап турар бис. Чеже-даа берге бол, Буян Оюн бүзүрелин чидирбейн, кадыкшылын экижидип алырынга идегеп, аарыг-биле демисежирин соксатпайн, чоок кижилерин муңгаратпайн, быжыг туруштуун көргүзүп турары өөрүнчүг. Ооң турум чаңы, дүжүп бербези, келир үеге бүзүрелдии кыдыында улустуң безин хей-аъдын көдүрүп, сергедиптер шынарлыг. Бо бүгү тура-соруу оон-даа күштүг болур кылдыр сагыш човангыр тыва чонувустан, «далайга дамды дуза» дээри ышкаш, дузадан кадарын дилеп тур бис. Донорларның ханы хүнү-биле херек бооп турар. Акша-төгерик талазы-биле материалдыг дузаны уруунуң Сбербанкыда картазынче чорудуп болур: 2202 2055 7622 2803 (уруу О. Долма Буяновна) Буян Владимировичиге сегип үнүп келиринге дузадан кадып көрээлиңерем, эргим чонувус! Хүндүткел болгаш бүзүрел-биле, «Тывамедиагрупп» Парлалга бажыңының коллективи.