💥Көдээ ажыл-агый — чугула айтырыг
💥Көдээ ажыл-агый — чугула айтырыг 📢«Ада-чурт камгалакчылары» фондунуң Тыва Республикада салбырынга тускай шериг операциязының хоочуннарының аразынга көдээ ажыл-агыйның хөгжүлдезинге тураскааткан ужуражылга болган. Ужуражылганың киржикчилеринге Тываның Көдээ ажыл-агый яамызының төлээлери грант деткимчелиг «Агромотиватор» биле «Агростартап» программалар дугайында тайылбырлап берген. Ол дээрге мал болгаш чер ажыл-агыйлары эгелеп алыр азы улгаттырар сорулгалыг кижилерге деткимче көргүзер хемчеглер-дир. Хемчегге 60 ажыг кижи киришкен. Аңаа чүгле дайынчы хөделиишкиннер киржикчилери эвес, оларның өг-бүлелериниң кежигүннери база келген. Киржикчилерниң саны хөй болган. Видеоконференция аргазы-биле болган ужуражылгага кожууннардан күзелдиг кижилер база киришкен. Ужуражылганың темазы бистиң регионда эң-не чугула айтырыг болган. Дыка хөй ТШО хоочуннары чанып келгеш, мал-маган тудуп, көдээ ишче кирерин бодап турар. Тывада көдээ ажыл-агыйже сонуургал өзүп турар. Мал ажыл-агыйы ёзу-чаңчылывыс болгаш бүзүрелдиг тыл дээрзи билдингир болгай. Тайбың амыдыралга келгеш, чер болгаш мал ажыл-агыйынче шилчип, өг-бүлезин азыраар сорулгалыг хоочуннар хөй болган. Ынчангаш Көдээ ажыл-агый яамызының ажылдакчылары «Агромотиватор» биле «Агростартап» программаларның негелделерин таныштырган: кым аңаа киржип болурул, акша-хөреңгизин кайнаар чарып болурул, бизнес-планны канчаар шын тургузарыл дээн ышкаш. Ужуражылга ажык чугаа хевирлиг болган. Дыка хөй киржикчилер специалистерден немелде консультациялар алыр дээш, бижидип алганнар. Бистиң корр. Медээни болгаш чурукту «Ада-чурт камгалакчылары» фондунуң Тыва Республикада салбырының социал четкиде арнындан алган. “Шын” №9 2026 чылдың март 12