💥“Чедер” курорт
💥“Чедер” курорт ⚡Март 8-те магаданчыг кежээлер 📢Кадыкшылга курорту “Чедерде” дыштанып турар кижилерге Бүгү-делегейниң херээженнер байырлалы Март 8-тиң хүннери хөглүг болзун дээш, курорттуң удуртулгазы болгаш ажылдакчылары республикада ат-сураа билдингир артистерни, ыраажыларны чалап, уран чүүлдүң болгаш дыштанылганың магаданчыг кежээлерин организастаан. Херээженнер байырлалының бүдүүзү март 7-де "Саян" ансамбльдиң артизи, Тыва Республиканың алдарлыг артизи Орлан Маржымал биле Тываның хөгжүм-шии театрының артизи Ачыты Салчак “Чедерде” дыштанып турар чон-биле ужуражып, боттарының чогаадыкчы ажылы-биле таныштырып, сыгыт-хөөмейни уярадыр бадырып, боттарының репертуарында амгы үениң аныяктарының ырларындан аңгыда, совет үениң “эрги” ырларын ырлап турганнар. Улуг назы-харлыг кижилер болгаш аныяктар-даа “Магаданчыг кежээ”, “Чүшкүрбейн баарың ол бе” дээш өске-даа ырларны ыраажылар-биле кады сеткил-хөөнүн хандыр ырлашканнар. Март 8-тиң кежээзинде “Чедер” курортка Борис Салчактың “Салчак” студиязының ыраажы, самчы оолдар, уруглары болгаш Тываның алдарлыг артизи Олег Сарыглар аалдап келгеннер. Студияның самчылары амгы үеге таарыштыр тургускан тыва танцыларны күүсеткенин көрүкчүлер сонуургап көргеннер. “Салчак” студиязының элээди артистери амгы үениң ырларын база күүсеткеннер. Эң ылаңгыя Каң-оол Адыяаның сыгыт-хөөмейин аажок магадап дыңнааннар. Тыва Республиканың алдарлыг артизи Олег Сарыглар чоннуң ынак ырлары “Чалыы үем далашпа даан”, “Бүзүрелдиг ынакшыл” дээш өске-даа ырларны ырлай бээрге, залда көрүкчүлер, “Салчак” студияның кежигүннери ыраажы-биле кады ырлажып турганнар. Частың, аваларның байырлалы Март 8-те солун программалыг концерттерни бараалгатканы дээш, магаданчыг кежээлерни организастааны дээш, артистерге болгаш “Чедер” курортунуң ажылдакчыларынга өөрүп четтиргенин дыштанып турар кижилер илереткеннер. “Чедер” курортка кадыын экижидип алыр дээш келген кижилерниң эмнээшкиннерден хостуг үезинде дыштанылгазын солун болгаш ажыктыг болзун дээш, таарымчалыг байдалды тургузуп турарын демдеглээр апаар. Курорттуң чуртталга корпузунда теннис, бильярд залдары бар. Мага-бот, хан-дамыр сайзырадырынга ажыктыг тренажёрлар залын ажыдар дээш, белеткел ажылдарын чорудуп турар. / Ш. МОҢГУШ. Авторнуң тырттырган чуруктары. “Шын” №9 2026 чылдың март 12