💥Часкы хову ажылдарынга белеткелди дүргедедир
💥Часкы хову ажылдарынга белеткелди дүргедедир 📢Тыва Республиканың Чазааның ээлчеглиг Аппарат хуралынга кол айтырыгларның бирээзи 2026 чылда часкы хову ажылдарынга белеткел болган. Республиканың Көдээ ажыл-агый яамызының дыңнаткан сан-чурагайлары-биле алырга, бо чазын хову ажылдарын 28 муң га ажыг шөлдерге чорудар. Картофель тарып өстүрер шөлдүң хемчээлин эрткен 2025 чылдыындан 1,8 катап улгаттырган, ногаа аймаан — 1,7 катап. Красноярскының статистика эргелелиниң медээлери ёзугаар алырга, эрткен 2025 чылда Тываның көдээ ажыл-агыйлары 29,2 муң гектар шөлге тараа болгаш ногаа аймаан тарып өстүрген. 19 муң гектар шөлге — мал чеминге ажыглаар сигенни, тараа аймаан — 7,9 муң, картофель болгаш ногаа ай- маан — 1,6 муң гектар черге. Келир чайын хову ажылдары чорудар шөлдү бо чылда кызырганының бир чылдагааны – бүгү Россияда (ол ышкаш Тывада база) шөлдерге суггаттың болгаш минералдыг чемишчидилгениң бедик технологияларын ажыглаарын калбартыр угланыышкынны нептередип эгелээни. “Мелиорация адырынга системниг ажылдарны чорудуп турар бис. Барлык, Алаш суггарылга системаларының чаартылгазы дээш ниитизи-биле 10 төлевилелди боттандырып эгелээн бис. Ол дээрге республиканың аъш-чем аймаанга айыыл чок чорукту магадылаарынче чугула базым-дыр” — деп, Тываның Баштыңы Владислав Ховалыг демдеглээн. Курлавырда бар үрезинни четчелээр, аңаа немей үрезин садып алырын болгаш көдээ ажыл-агый техниказын часкы хову ажылдарынга белеткээрин, суггарылга четкилерин суггатка өй-шаанда киирер ажылдарны дүргедедир даалганы ТР-ниң Көдээ ажыл-агый яамызынга, кожууннар чагыргаларынга болгаш көдээ ажыл-агый килдистеринге Тываның Баштыңы берген. Ш. МОҢГУШ. Чурукту Тываның Баштыңының социал четкиде арнындан алган. “Шын” №9 2026 чылдың март 12