💥Херээжен чон-биле ужурашкан
💥Херээжен чон-биле ужурашкан 📢Бүгү-делегейниң херээженнер хүнүнүң бүдүүзүнде «Ада-чурт камгалакчылары» фондунуң салбырынга Чазак кежигүннери тускай шериг операциязының хоочуннары болгаш өөнүң иштилери, дулгуяктары, шериг албанныг херээжен чон-биле ужурашкан. Тываның Баштыңы Владислав Ховалыгның даалгазы-биле регионалдыг удуртулганың төлээлери ужуражылганың киржикчилеринге байырны чедирип, тускай шериг операциязының хоочуннарын болгаш шериг албанныгларны, ол ышкаш оларның чоок кижилеринге деткимче хемчеглерин калбартыр дугайында айтырыгларны сайгарып чугаалашкан. Ужуражылгага Тыва Республиканың Чазааның Даргазының оралакчылары Эдуард Сандан, Орлан Сарыглар, Шолбан Сендаш, Юрий Ананьин база Артына Бузур-оол, ол ышкаш Күш-ажыл болгаш социал политика яамызының, Кадык камгалал яамызының, республиканың Шериг комиссариадының төлээлери болгаш шериг операциязының киржикчилеринге болгаш өг-бүле кежигүннеринге социал деткимче хемчеглери көргүзер өске-даа ведомстволарның төлээлери киришкен. Ажык чугааның киржикчилери тускай шериг операциязының киржикчилеринге болгаш оларның өг-бүлелеринге ачы-дуза чедирерин калбартыр болгаш экижидер талазы-биле айтырыгларны сайгарган. Киржикчилер боттарының айтырыгларын үлешпишаан, шиитпирлерни хүлээп алырының дугайында санал-оналдарын болгаш хууда дилеглерин киирген. Чазак Даргазының оралакчызы Эдуард Сандан республика Баштыңы Владислав Ховалыгның өмүнээзинден херээжен чонга Март 8-биле байыр чедиргеш, оларның шупту айтырыгларынга харыыларны берген. Регионалдыг яамылар болгаш ведомстволар моон соңгаар ону ажылдап, боттандырары-биле хуралдың киржикчилеринден кирген санал-оналдарны протоколче киирген. Ужуражылганың төнчүзүнде Тываның Баштыңы Владислав Ховалыгның өмүнээзинден шупту херээжен чонга республика Баштыңының эң-не чылыг күзээшкиннери-биле боодал чечектерни тывыскан. А. МОНГУШ. Чурукту ТР-ниң Чазааның парлалга албанындан алган. “Шын” №9 2026 чылдың март 12