💥Технологияларның дузазы
💥Технологияларның дузазы 📢Ажы-төлдүг өг-бүлелерге болгаш амыдыралында берге байдалдыг хамаатыларга социал деткимчелер ооң ажылының бир кол мурнады көөр сорулгалары дээрзин Тываның Баштыңы Владислав Ховалыг социал четкиде бодунуң арнынга бижээн. «Бо хүнде Тывада 30 ажыг аңгы-аңгы деткимче хемчеглери ажылдап турар. Деткимче чедингир болуру чугула. Эптиг чат-ботту ажылдадып эгелээн Тываның Күш-ажыл болгаш социал политика яамызының бот-идепкейин деткидим. Ол дээрге көрдүнген деткимче хемчеглериниң дугайында шуптузун билип алыр бичии тайылбыр ному-дур. Ол ышкаш ТШО киржикчилеринге «чаңгыс көзенек» аргазын нептередирин уламчылап турар бис. Ооң ачызында ам билдириишкинни шупту ведомстволарже автомат шилчий бээр кылдыр киирип болур. Бистиң амыдыралывысты экижидери-биле технологиялар база чаарттынып турар. МАХ мессенджерниң дузазы-биле хөй ажы-төлдүг өг-бүлениң, пенсионерниң азы инвалид кижиниң сан-чурагайлыг шынзылгазын долдурары белен апарган. Ам сан-чурагайлыг ID алырда, биометрия чокка, Госуслугиге чүгле чөпшээрелин бериптер апарган. Ол дээрге саазын шынзылга ап чорбайн, телефонда QR-код-биле бодунуң эрге-байдалын шынзыдыптары база кончуг дүрген чиигелдени ап болуру-дур» — деп, Владислав Ховалыг бижээн. Бистиң корр. Чурукту Тываның Баштыңының социал четкиде арнындан алган. “Шын” №9 2026 чылдың март 12