| МЭЭҢ АВАМ |
| МЭЭҢ АВАМ | 💥Авамны сагындым 📢Тываның алдарлыг артизи, режиссёр Орлан Монгуш: – Кандыг-даа кижиге авазы дег эргим кижи бо делегейде чок. Мээң авам база меңээ төнчү чок октаргай-дыр. Бо улгаткыже авамны ам-даа бодап, сактып чоруур-дур мен. Угаан кирип, чуртталганың утказын биле бергеш безин, өйлеп-өйлеп ону чоктап, ооң чагыг-сүмезин манагзынган ышкаш үелер тургулай бээр. Ол хамаанчок авамның чылыг, хоюг холдарынга суйбадып, хаваам чыттаан эриннериниң чымчаанга таалап, ону дыңзыдыр куспактап алгаш, чажымда дег чассыксай бээр мен. Мээң бир дугаар башкым ол деп санаар мен. Школа назыны четпээн бичии беш харлыг чүвени чамдыкта ажылынче эдертип алгаш, өөреникчилерге кичээл эрттирерге, мен оларны өттүнүп айтырыгга харыылаар дээш, холум көдүрүп, “Авай, авай, мен харыылаайн” деп турганым шын. Бажыңга келгеш, авам “Авай” эвес, “башкы, башкы” дээр чоор, оглум” деп чагып турганын утпас мен. Школа доозуп, улгаткыжемге чедир, “Космонавт боор сен шүве, оглум” дээр кижи. Космонавт-даа болбайн барган мен, ынчалза-даа улуг уран чүүлдүң төнчү чок октаргайы ышкаш делгеминде космонавт ышкаш эжиндирип чор мен. Бо өртемчейден чоруур үем кээрге, авам хөөкүй караамга бо көстүп келир боор. Авам Мижит Чымбаевна Монгуш чораан болза, бо чылын 92 харлаар ийик. Бүгү назынында башкылааш, РСФСР-ниң алдарлыг башкызы, “Улус өөредилгезиниң тергиини” атка чедир ажылдааш, барып-барып, Башкылар хүнүнде дуу өртемчейже чоруй барган... “Шын” №8 2026 чылдың март 5