Бүгүн, от ыйын 10 күнүгэр, ЕГЭ уонна демонстрационнай экзаменнар түмүктэринэн 100-түү б...
Бүгүн, от ыйын 10 күнүгэр, ЕГЭ уонна демонстрационнай экзаменнар түмүктэринэн 100-түү баалы ылбыт уонна республика чиэһин Бүтүн Россиятааҕы олимпиадаларга көмүскээбит Сахабыт сирин бастыҥ үөрэнээччилэрэ уонна кинилэр наставниктара Ил Дархан Айсен Сергеевич Николаев илиититтэн 100-түү тыһ. солк. бириэмийэни туттулар. Ол курдук, демонстрационнай экзамеҥҥа 100 баалы ылбыт ыччаттарбыт кэккэлэригэр биһиги улуус киэн туттар ыччата, Үөһээ Бүлүүтээҕи техникум "Пожарная безопасность" идэтин бүтэрбит Борис Иванов баар. Киниэхэ 100 тыһыынча солкуобай суумалаах бириэмийэ туттарыллыбытынан улаханнык үөрэн туран эҕэрдэлиибин! Борис Иванову маннык үрдүк таһымҥа бэлэмнээбит, билиини-көрүүнү иҥэрбит, олоххо суолун ыйбыт преподавателларыгар Юлиан Дмитриевич Петровка уонна Семен Михайлович Петровка, Үөһээ Бүлүүтээҕи техникум салайааччытыгар Матрена Васильевна Осиповаҕа улуус бары олохтоохторун аатыттан уонна тус бэйэм ааппыттан истиҥ махталбын тиэрдэбин! Эһиги сыралаах үлэҕит, үөрэнээччилэргитигэр биэрбит билиигит уонна уопуккут Борис курдук талааннаах ыччаттар үүнэн-сайдан тахсалларыгар олук буолар. Эһиги кэлэр көлүөнэҕэ туһугар киллэрэр кылааккыт сыаната суох! Кинилэри сэргэ биһиги улуус киэн туттар ытык-мааны учууталлара, Российскай Федерация народнай учуутала Виктор Филиппович Потапов уонна Российскай Федерация, Саха Республикатын үтүөлээх учуутала, М.А. Алексеев аатынан бириэмийэ лауреата Илья Гаврильевич Кысылбаиков ЕГЭ-ҕэ 100 бааллаах оҕолору бэлэмнээн Ил Дархан махтал суругун уонна харчынан бириэмийэни туппуттарынан ис сүрэхпиттэн эҕэрдэлиибин! Бука барыгытыгар чэгиэн доруобуйаны, дьолу-соргуну уонна инники үлэҕитигэр, олоххутугар саҥа үрдэллэри баҕарабын! Ис сүрэхтэн ытыктабылы кытта, Үөһээ Бүлүү улууһун баһылыга Валерий Николаев